ერთიანი ეროვნული გამოცდები დღეს ქართული ენისა და ლიტერატურის გამოცდით დაიწყება. ქვეყნის მასშტაბით სულ 24 საგამოცდო სივრცეა მოწყობილი.
პანდემიის პირობებში, აბიტურიენტებს საგამოცდო სივრცეებში უსაფრთხოების შეცვლილი ნორმები დახვდებათ.
„საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს რეკომენდაციების შესაბამისად, გამოსაცდელები და მეთვალყურეები დაიშვებიან ყოველი საგამოცდო სექტორის ფართობის მხოლოდ 50 პროცენტზე. თითოეული სამუშაო მაგიდა წინა მხრიდან აღჭურვილი იქნება გამჭვირვალე დამცავი ფარით/ბარიერით; მაგიდებს შორის სიგანეში დაშორება იქნება მინიმუმ ორი მეტრი, ერთმანეთის მიმდევრობით განლაგებულ მაგიდებს შორის მანძილი კი – ერთ მეტრზე მეტი“, – აცხადებენ გამოცდების ეროვნულ ცენტრში.
ცენტრი ასევე აქვეყნებს საგამოცდო ცენტრების მისამართებსა და მისასვლელ მარშრუტებს.
