„ევროპული საქართველოს“ ერთ-ერთი ლიდერი დავით ბაქრაძე აშშ-ს საელჩოს რეზიდენციაში მივიდა, სადაც ოპოზიციისა და ხელისუფლების წარმომადგენლები ელჩების შუამავლობით შეხვედრას მართავენ. როგორც ბაქრაძემ ჟურნალისტებთან განაცხადა, გუშინ ცესკოში განვითარებულმა მოვლენებმა „ოცნებასთან“ დიალოგი გაართულა.
„დაველოდებით რას წარმოადგენს „ქართული ოცნება“, მაგრამ დიალოგის პროცესი ძალიან გაართულა ცესკო-ს მიერ გუშინ მიღებულმა გადაწყვეტილებამ, რომელიც ვადების დაჩქარებით იქნა მიღებული, ოპოზიციისთვის სასამართლოს უფლების წართმევით და კანონის პირდაპირი დარღვევით.
ეს არის რეალური პასუხი ხელისუფლების მხრიდან, აქ მიმდინარე დიალოგზე, სიტუაციის დეესკალციის მცდელობაზე, ისედაც რთული დიალოგის პროცესი უფრო გართულდა, დანარჩენს დაველოდოთ და შევხედოთ. შევდივართ იმ განწყობით, რომ გამოსავალი მოვძებნოთ და ქვეყანა კრიზისიდან გამოვიყვანოთ“,-განაცხადა ბაქრაძემ.
