დიმიტრი ხუნდაძე ქობულეთის მუნიციპალიტეტში გარდაცვლილი 14 წლის არასრულწლოვნის ფაქტს პარლამენტის პლენარულ სხდომაზე გამოეხმაურა. ჯანდაცვის კომიტეტის თავმჯდომარის განცხადებით, ამ ფაქტზე პასუხისმგებლობა ყველამ უნდა აიღოს.

„სამწუხაროა, როდესაც ჩვენს ქვეყანაში, საზოგადოებაში საკუთარ ოჯახში ბავშვი ძალადობის მსხვერპლი ხდება, აქ, რა თქმა უნდა, ყველას პასუხისმგებლობაა, უპირატესია სახელმწიფოს პასუხიმგებლობა და როცა ასეთი ფაქტი ხდება, ფაქტია, რომ რაღაც დავაკელით და ისე არ გავაკეთეთ, რასაც უნდა ვაკეთებდეთ, ამიტომ ყველამ უნდა ავიღოთ პასუხიმგებლობა, სკოლამ, საზოგადოებამ, ოჯახმაც, მაგრამ უპირატესია სახელმწიფოს პასუხისმგებლობა“, – განაცხადა დიმიტრი ხუნდაძემ.

სექსუალური კავშირის დამყარებასა და თვითმკვლელობამდე მიყვანის ფაქტზე 23 წლის კაცია დაკავებული. გამოძიების ვერსიით, 23 წლის კაცმა მიუხედავად იმის ცოდნისა, რომ გოგო 16 წლამდე იყო, გასული წლის ივნისსა და დეკემბერში მასთან მოტყუებით სექსუალური კავშირი დაამყარა, შემდეგ კი კონტაქტი გაწყვიტა.

პროკურატურის ინფორმაციით, 14 წლის გოგომ, 9 თებერვალს, თავი მოიკლა.

გარდაცვლილი გოგოს მიმართ შესაძლო სხვა ძალადობის ფაქტებზე გამოძიება გრძელდება. ერთ-ერთი ვერსიით მასზე ოჯახის წევრები ფიზიკურად ძალადობდნენ.

14 წლის მოზარდის მიმართ სექსუალური ძალადობის ბრალდებით დაკავებულ 23 წლის კაცს პატიმრობა შეეფარდა.