„ნაციონალური მოძრაობის“ წევრი დიმიტრი შაშკინი გუშინ, დმანისში მომხდარ დაპირისპირებას ეხმაურება. შაშკინის თქმით, „ქართული ოცნების“ მაჟორიტარობის კანდიდატის, გოგი მეშველიანის ორგანიზებული ბანდა ერთმანეთს დაუპირისპირდა.
„ბოლო ერთი თვის განმავლობაში ბოლნისის, დმანისისა წალკის და თეთრიწყაროს რაიონში მოქმედებს კარგად ორგანიზებული ბანდა, რომელიც არის შექმნილი გოგი მეშველიანის მიერ.
პირველი დაპირისპირება ამ ბანდის წევრებს შორის მოხდა ბოლნისში, როდესაც თბილისიდან „ქართული ოცნების“ შტაბიდან გამოგზავნილი ფულიდან გაქრა დიდი თანხა, თუმცა ეს სროლამდე არ მისულა.
გუშინ დმანისში იგივე განმეორდა, ფული ვერ გაიყვეს. მოწმეები ადასტურებენ, რომ სროლის წინ იყო ხმამაღალი კამათი ფულთან და ბენზინის ტალონებთან დაკავშირებით, რომელიც გამოდიოდა „ქართული ოცნების“ ოფისიდან და ამ კამათს მოყვა სროლა.
ორი ადამიანი დაჭრილია ფეხებში, ერთი ტანის არეში, ყველანი არიან „ქართული ოცნების“, გოგი მეშველიანის შტაბის წევრები. თუ ეს ბანდა არ გაჩერდება, ეს ყველაფერი დასრულდება ძალიან ცუდად, უკვე ერთმანეთს ესვრიან.
ეს ხალხი უნდა იყოს დაკავებული და მიღებული იყოს ზომები ამ ბანდის ხელმძღვანელის წინააღმდეგ“,- განაცხადა შაშკინმა.
