დღეს თბილისის საქალაქო სასამართლომ დოდო გუგეშაშვილის დაჭრისა და მისი შვილის მკვლელობის საქმის არსებითი განხილვა დაიწყო.
პროცესის დაწყებამდე დოდო გუგეშაშვილმა კმაყოფილება გამოთქვა გამოძიების მიმდინარეობით, თუმცა აღნიშნა, რომ ამ დრომდე მკვლელობის დამკვეთი უცნობია.
დღესვე ცნობილი გახდა, რომ დაზარალებულის ინტერესებს აღარ იცავს ადვოკატი გელა ნიკოლეიშვილი, ვინაიდან გამოძიებამ ის ამავე საქმეზე მოწმის სტატუსით დაკითხა.
დოდო გუგეშაშვილის თქმით, მის ადვოკატს სასჯელაღსრულების დაწესებულებაში მყოფმა ერთ-ერთმა პატიმარმა მიაწოდა მნიშვნელოვანი ინფორმაცია მომხდარი თავდასხმის შესახებ. აღნიშნული პატიმარი ირწმუნება, რომ პირველად დოდო გუგეშაშვილის ლიკვიდაცია თურქეთში რუსულმა სპეცსამსახურებმა მას შესთავაზეს, თუმცა უარი თქვა.
„პრაიმტაიმთან“ საუბრისას გუგეშაშვილი ადასტურებს, რომ გამოძიებამ ზემოხსენებული პატიმარი ციხეში დაკითხა.
ჩვენი ინფორმაციით, საუბარია 2017 წლის დეკემბერში, პანკისის ხეობაში ტერორიზმის ბრალდებით დაკავებულ ზურაბ გორნაკაშვილზე.
