დოჰაში, სოფლის მეურნეობის საერთაშორისო გამოფენაზე 15 ქართული კომპანიის პროდუქციაა წარმოდგენილი
საქართველოს გარემოს დაცვისა და სოფლის მეურნეობის სამინისტროს და კატარის სახელმწიფოში საქართველოს საელჩოს ორგანიზებით, დოჰაში სოფლის მეურნეობის საერთაშორისო გამოფენაზე Agriteq 2021, 15 ქართული კომპანიის – „გურიელი“, „ნათსჯი“, „ჩიკორი“, „გეო ნატურალი“, „აგრითაჩი“, „ელექსირ საქართველო“, „ნუგბარი“, „რუხი 2“, „მაგრიტო“, „კამპა“, „მანნა“, „ბორჯომი“, „კულა“, Georgia’ Natural და Kind&Noble – პროდუქციაა წარმოდგენილი.
ინფორმაციას სოფლის მეურნეობის სამინისტრო ავრცელებს.
პანდემიით შექმნილი ვითარების და დაწესებული შეზღუდვების გამო, გამოფენაზე ქართულ კომპანიებს კატარში საქართველოს საელჩო წარმოადგენს.
„აგრიტექი“ სპარსეთის ყურის რეგიონში ერთ-ერთი ყველაზე მასშტაბური საერთაშორისო გამოფენაა, რომელსაც მრავალი ათასი ვიზიტორი ჰყავს. წელს გამოფენაში მონაწილეობას 42 ქვეყანა და სოფლის მეურნეობის სექტორში მოქმედი 208 ადგილობრივი და საერთაშორისო კომპანია იღებს. გამოფენაში მონაწილეობა მნიშვნელოვანი შესაძლებლობაა კატარში და ზოგადად, სპარსეთის ყურის რეგიონში ქართული პროდუქციის პოპულარიზაციის და ექსპორტის ზრდის ხელშეწყობისთვის.
Agriteq 2021 27 მარტს დასრულდება.
