პანკისის ხეობის სოფელ დუისისა და მატანში მცხოვრები პირების შერიგების პროცესი მიმდინარეობს.
ადგილობრივების ინფორმაციით, დაპირისპირების დროს ნაცემია ორი პირი, მათ შორის, მალხაზ მაჩალიკაშვილის ძმა, რომელიც ინციდენტის მონაწილე არ არის.
ის ახმეტიდან დუისისკენ გადაადგილებას ცდილობდა და მხოლოდ იმიტომ გაუსწორდნენ, რომ ეთნიკური ქისტია.
მალხაზ მაჩალიკაშვილი ამბობს, რომ მის ძმას, თავის არეში დაზიანებები აქვს მიყენებული.
„ჯერ იყო, შვილი მომიკლეს, ძმისშვილი დამიპატიმრეს, ახლა ამას სცემეს უდანაშაულოდ. ყველა მე მერჩის. არ ვაპატიებ, ამ ამბავს“, – განაცხადა მაჩალიკაშვილმა.
რაც შეეხება , მეორე ნაცემ ახალგაზრდას, ის, ტვინის შერყევის დიაგნოზით, თელავში, ყამბარაშვილის კლინიკაში მკურნალობს.
სოფელ მატანში, ახალგაზრდების შეკრების ადგილას მხოლოდ პოლიცია იმყოფებოდა.
სოფელ დიუსში, ადგილობრივი ქისტები ამბობენ, რომ პროცესი შერიგებით უნდა დასრულდეს.
„გუშინ მორიგდნენ და დაიშალნენ. დღეს წესით აღარ უნდა შეკრებილიყვნენ. ეს ამბავი, აუცილებლად შერიგებით უნდა დასრულდეს“, – განაცხადეს ადგილობრივებმა.
დაპირისპირება დუისელ ქისტებსა და სოფელ მატანში მცხოვრებ ახალგაზრდებს შორის, ავტომანქანით მაღალი სიჩქარით გადაადგილებას მოჰყვა, რა დროსაც ნასვამ მდგომარეობაში მყოფმა ახალგაზრდებმა, პანკისის ხეობაში ქათამი გაიტანეს.
ურთიერთშელაპარაკება, ხელჩართულ ჩხუბში გადაიზარდა. ნაცემია ორი ახალგაზრდა.
ავტორი: ხათუნა გულიაშვილი
ასევე დაგაინტერესებთ:
სოფელ დუისში ახალგაზრდებს შორის ფიზიკური დაპირისპირება მოხდა – ადგილზე მობილიზებულია პოლიცია
