ძალიან კარგია, რომ ჩვენმა ოპონენტებმა პროტესტის ასეთი ფორმა გადაიფიქრეს, – ამის შესახებ საპარლამენტო უმრავლესობის წევრმა, შალვა პაპუაშვილმა განაცხადა.
„ძალიან კარგია, რომ ჩვენმა ოპონენტებმა გაიაზრეს, ის, რაც მოხდა პიკეტირების კუთხით, იყო აბსოლუტურად წარმოუდგენელი რამ. ძალიან კარგია, რომ მათ გადაიფიქრეს ასეთი ტიპის ღონისძიებები და პროტესტის ასეთი სახით გამოხატვა. ვურჩევდი, რომ მომავალში ასე გააგრძელონ.
რაც შეეხება დიალოგს, ამ დიალოგისთვის ჩვენ გახსნილები ვართ, მათ შორის დაწყებული გვაქვს ერთი ფორმატი, ეს იყო საარჩევნო რეფორმის სამუშაო ჯგუფი, სადაც მათ მონაწილეობის მიღება და იმ დიალოგის ბოლომდე მიყვანა შეეძლოთ, რაც შეეხებოდა საარჩევნო სისტემას. მეორე ფორმატი – ეს არის საგამოძიებო კომისია, სადაც მათ შეუძლიათ, მონაწილეობა მიიღონ და ისინი იყვნენ წამყვანები ამ კომისიაში, რათა 31 ოქტომბრის არჩევნებთან დაკავშირებით თუკი რაიმე ეჭვი აქვთ, თავად გამოიკვლიონ. ჩვენ სხვა ნებისმიერი ფორმატისთვისაც ვართ მზად. ჩვენ დარწმუნებული ვართ საკუთარ თავში, რადგან ჩვენ ვართ სიმართლის მხარეს,“ – განაცხადა პაპუაშვილმა.
