„გახარიას მიმართ ასეთი მასიური შეტევა მმართველი პარტიის და ოპოზიციის მხრიდანაც მთლად არ არის საერთო საქმისთვის კარგი”, – ამის შესახებ პარტია „სამართლიანობისთვის” ლიდერმა, ეკა ბესელიამ განაცხადა.

მისი თქმით, გიორგი გახარიამ „რეაქციაში” ინტერვიუს დროს დაადასტურა, რომ ქვეყანაში მმართველობის ჯანსაღი ფორმა არ გვაქვს.

„ვფიქრობ, საკმაოდ მოზომილი იყო, მაგრამ პრაქტიკულად დაადასტურა ის,რომ ქვეყანაში არ გვაქვს ინსტიტუტები, არ არის მმართველობის ჯანსაღი ფორმა და არაფორმალური მმართველობაა, რომელიც საფრთხეს უქმნის ამ ინსტიტუტების ჩამოყალიბებას მომავალშიც. მან ისაუბრა იმ საკითხებზე, რომელზეც მე 2 წლის წინ ვსაუბრობდი, მან დაადასტურა, რომ მმართველი პარტიის შიგნით თავის ფუნქცია არავინ იცის და ისინი ერევიან აღმასრულებელი ორგანოების საქმიანობაში ისე, რომ ეს სცდება მათი უფლებამოსილების ფარგლებს. საუბარია პარტიულ გადაწყვეტილებებზე და არა საკანონმდებლო ორგანოს ქმედებაზე. მივესალმებოდი, რომ პარლამენტს ჰქონოდა ძლიერი საკონტროლო მანდატი. საუბარია იმაზე, რომ პარტია ცდილობს, გავლენა მოახდინოს მთლიანად აღმასრულებელი და საკანონმდებლო ორგანოს გადაყვეტილებაზე. ძალიან ზომიერი იყო, მას ბევრი რამ ჯერ არ უთქვამს, შეიძლება ყველაფერი არც არასდროს თქვას, ეტაპობრივად შეიძლება გაცილებით უფრო მეტად გაიხსნას, მაგრამ რაც თქვა, ის ადასტურებს, რომ ქვეყანაში სისტემური პრობლემები გვაქვს, მათ შორის ყველაზე რთული რაც არის,ეს არის არაჯანსაღი მმართველობის სტილი და ინსტიტუტების არარსებობა, რომელიც დემოკრატიას აბსოლუტურად კლავს“, – განაცხადა ბესელიამ.