ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა ეკატერინე ტიკარაძემ, დღეს „თავისუფალი სივრცის” შეკითხვებს უპასუხა.
ჟურნალისტის კითხვას, აჭარა დგას ზღვარზე და თუ მოსახლეობამ არ გაითვალისწინა ის რეკომენდაციები, რომელსაც ჯანდაცვის სამინისტრო გასცემს, შესაძლოა მთავრობამ მიიღოს აჭარის ჩაკეტვის გადაწყვეტილება?! მინისტრი პასუხობს:
„ალბათობები არამხოლოდ საქართველოს, ყველა ქვეყანას აქვს. ჩვენ ვართ მუდმივ კომუნიკაციაში საერთაშორისო ორგანიზაციებთან. ვიზიარებთ სხვადასხვა ქვეყნების გამოცდილებასაც და სწორედ გამოცდილების ეფექტურობის შეწონვიდან გამომდინარე ვიღებთ გადაწყვეტილებებს. შესაძლებლობები დგას ამის როგორც საქართველოში, ასევე უცხოეთში.“ – განაცხადა ეკატერინე ტიკარაძემ.
მინისტრის თქმით, აჭარა უახლოვდება წითელ ზღვარს, ამიტომ მნიშვნელოვანია იმ რეკომენდაციების დაცვა, რომელსაც მედიკოსები გასცემენ.
„მნიშვნელოვანია რადიკალური გადაწყვეტილების მიღების შეწონვა დამდგარ შედეგთან მიმართებაში, რომელსაც ჩვენ მივიღებთ. ამასთან დაკავშირებით ჩვენ ვიქნებით ფრთხილი. დღეს ვისაუბრეთ ინფექციის გავრცელების კოეფიციენტებზე, რომელიც არის საგრძნობლად მომატებული და ეს უკვე 3-ს აღემატება.
ასევე ინცინდენტობა, რომელიც აჭარის რეგიონისთვის არის, ის უკვე უახლოვდება წითელ ზღვარს, თუმცა თუ აჭარის მოსახლეობის დამყოლობა იქნება შესაბამისი და ისინი დაიცავენ იმ ღონისძიებებს, რომელიც არაერთხელ არის მოწოდებული, ჯერ კიდევ გვაქვს იმის იმედი, რომ აჭარა შეძლებს და ძალიან მალე დაუბრუნდება მწვანე ზონას.
საჭიროა მოსახლეობის ინტენსიური ჩართულობა და მათი მხრიდან რეკომენდაციების გატარება, ასევე ეკონომიკური სექტორიდან მნიშვნელოვანია გაიაზრონ ეს პრობლემატიკა და შესაბამისი ჩართულობა განახორციელონ, ვგულისხმობ თერმოსკრინინგს, დეზობარიერის ქონას და ანტისეპტიკური საშუალებით ხელების დამუშავებას.“ – განაცხადა ეკატერინე ტიკარაძემ.
"თუ აჭარის მოსახლეობა შეძლებს და დაიცავს რეკომენდაციებს, გვაქვს იმედი, რომ აჭარა დაიბრუნებს მწვანე ზონის სტატუსს" – აცხადებს ჯანდაცვის მინისტრი ეკატერინე ტიკარაძე "თავისუფალ სივრცეში"
Posted by აჭარის ტელევიზია • Ajara TV – საზოგადოებრივი მაუწყებელი on ოთხშაბათი, 16 სექტემბერი, 2020
