საქართველოში კორონავირუსის ინფიცირებულთა რაოდენობა რეკორდულად იზრდება. დღეს ინფიცირებულთა რაოდენობამ 44-ით მოიმატა. როგორც ხელისუფლებაში აცხადებენ, საქართველო კარანტინის რეჟიმში იმ შემთხვევაში გადავა, თუ ქვეყანაში ინფიცირებულთა რაოდენობა ყოველდღიურად ორმაგად გაიზრდება.

როგორც ჯანმრთელობის დაცვისა და სოციალურ საკითხთა კომიტეტის თავმჯდომარის პირველმა მოადგილემ ლადო კახაძემ „პრაიმტაიმნიუსთან” საუბრისას განაცხადა, საქართველოში არსებული ეპიდვითარება გამწვავების ფაზაშია.

„საქართველოში არსებული ეპიდვითარება გამწვავების ფაზაშია. ჩვენ ეპიდვითარების გამწვავებას მოველოდით, რადგან როგორც კი ეკონომიკას გახსნი და მობილობა მოიმატებს, ბუნებრივია, ინფიცირებულთა რაოდენობა გაიზრდება.

კორონავირუსის ასეთი მატების გამო, ქვეყანაში კარანტინი არ  გამოცხადდება. იმ შემთხვევაში, თუ ქვეყანაში ვირუსის ორმაგი მატება იქნება, მაგალითად, თუ დღეს არსებული 44 შემთხვევის შემდეგ, ხვალ 88 შემთხვევა დაფიქსირდება, ქვეყანაში საჭირო იქნება მობილიზება და კარანტინის გამოცხადება.

ორმაგი შემთხვევების დაფიქსირება ქვეყნისთვის ძალიან დიდი დარტყმა იქნება, ამიტომ ყველა ადამიანს მოვუწოდებ, დაიცვას რეკომენდაციები, დაიცვას ერთმანეთთან დისტანცია და ყველამ ატაროს პირბადე, რათა საკუთარი თავი და სხვა ადამიანები დავიცვათ ინფექციისგან“,- განაცხადა კახაძემ.

ინფორმაციისთვის, დღეს საქართველოში კორონავირუსის 44  ახალი შემთხვევა დაფიქსირდა. ამჟამად ინფიცირებულთა რაოდენობა 1773-ს შეადგენს, აქედან გამოჯანმრთელებულია 1325 ადამიანი.

ავტორი: ეკატერინე ზარნაძე