საგარეო საქმეთა მინისტრმა დავით ზალკალიანმა, აშშ-ის კონგრესში წარდგენილ დაფინანსების კანონპროექტთან დაკავშირებით განმარტება გააკეთა და თქვა, რომ ეს არ არის კანონი, არამედ არის რეპორტი, რომელსაც არანაირი ძალა არ აქვს.
მისი თქმით, ოპოზიცია ლობისტების საშუალებით ცდილობს კანონში ქვეყნისთვის დამაზიანებელი დეფინიციები მოხვდეს.
„ეს არის კიდევ ერთი ტყუილი. ორი დღის განმავლობაში ამტკიცებდნენ, რომ ეს არის კანონი, რომელიც საქართველოს უკვე დაუწესეს. იყო მცდელობა, რომ დებულებები კანონპროექტში შესულიყო, მაგრამ არ შესულა და ამჟამად არის რეპორტში, რომელსაც არანაირი ძალა არ აქვს.
რაც შეეხება კანონპროექტს, ჩვენი ხელისუფლება ყველაფერს აკეთებს იმისთვის, რომ კანონპროექტში მოხვდეს ისეთი დეფინიციები, რაც არის დაკავშირებული ჩვენი ქვეყნის სუვერენიტეტთან, ტერიტორიულ მთლიანობასთან, არაღიარების პოლიტიკასთან, ოპონენტები ცდილობენ, რომ ლობისტური საქმიანობის შედეგად ქვეყნისთვის დამაზიანებელი დეფინიციები მოხვდეს კანონში“,- განაცხადა დავით ზალკალიანმა.
ცნობისთვის, ამერიკის შეერთებული შტატების კონგრესში 2021 წლის საგარეო ოპერაციების დაფინანსების კანონპროექტია წარდგენილი, სადაც ნათქვამია, რომ საქართველო 2021 წელს დახმარების სახით არანაკლებ 132 025 000 აშშ დოლარს მიიღებს.
გაწერილია დახმარების წინაპირობაც. კონკრეტულად, ამ თანხის 15%-ის საქართველოსთვის გადაცემა შესაძლოა შეჩერდეს იქამდე, სანამ აშშ-ს სახელმწიფო მდივანი არ გადაწყვეტს, რომ საქართველოს მთავრობა შესაბამის ნაბიჯებს დგამს კორუფციასთან ბრძოლის, დემოკრატიული ინსტიტუტების გაძლიერების, კერძო სექტორში კანონის უზენაესობის და საერთაშორისოდ აღიარებული სტანდარტების დაცვის კუთხით.
