ევროკავშირი დე ფაქტო სამხრეთ ოსეთის ხელისუფლებას ზაზა გახელაძის პატიმრობიდან დაუყოვნებლივ გათავისუფლებას მოითხოვს – ამის შესახებ სპეციალურ განცხადებას ევროკავშირი აქვეყნებს, სადაც რუსეთს ევროპული სასამართლოს მიერ მიღებული გადაწყვეტილების შესახებ დაკისრებულ პასუხისმგებლობას ახსენებს.
“საქართველოს თვითგამოცხადებული რეგიონის სამხრეთ ოსეთის დე ფაქტო ხელისუფლებამ ბ-ნ ზაზა გახელაძის უკანონო პატიმრობა 12 წლით და 6 თვით გააგრძელა.
ევროკავშირი მოითხოვს ბ-ნ გახელაძის დაუყოვნებლივ გათავისუფლებას.
2020 წლის 11 ივლისს მისი უკანონო დაკავების შემდეგ, ევროკავშირი მის მყისიერ გათავისუფლებას დაჟინებით მოითხოვს, მათ შორის ევროკავშირის სადამკვირვებლო მისიის მიერ მართული ცხელი ხაზის მეშვეობით და ერგნეთის ინციდენტების პრევენციისა და მათზე რეაგირების მექანიზმის (IPღM) და ჟენევის საერთაშორისო დისკუსიების ფარგლებში.
ამ კონტექსტში, ევროკავშირი რუსეთის ფედერაციას ასევე ახსენებს მისი პასუხისმგებლობის შესახებ ადამიანის უფლებათა ევროპული სასამართლოს მიერ 2021 წლის 21 იანვარს მიღებული გადაწყვეტილების შესაბამისად.
ევროკავშირი მტკიცედ უჭერს მხარს საქართველოს სუვერენიტეტსა და ტერიტორიულ მთლიანობს მის საერთაშორისოდ აღიარებულ საზღვრებში და გააგრძელებს ადმინისტრაციული საზღვრების გასწვრივ მცხოვრები კონფლიქტის შედეგად დაზარალებული მოსახლეობის ადამიანის უფლებებისა და უსაფრთხოების მდგომარეობის საკითხების მოგვარებას ჟენევის საერთაშორისო დისკუსიებისა და ინციდენტების პრევენციისა და მათზე რეაგირების მექანიზმის (IPღM) შეხვედრების ფარგლებში.” – ნათქვამია განცხადებაში.
ცნობისთვის, ზაზა გახელაძე 2020 წლის 11 ივლისს დააკავეს და ის ოკუპირებულ ცხინვალში უკანონო პატიმრობაში იმყოფება. მას ოკუპირებული ცხინვალის ე.წ. სასამართლომ, 12 წლითა და 6 თვით უკანონო პატიმრობა მიუსაჯა.
