„ევროპულმა საქართველომ“ და „თავისუფალმა დემოკრატებმა“, შესაძლოა, არჩევნებში ბლოკის სახით მიიღონ მონაწილეობა. ამის შესახებ „პრაიმტაიმთან“ „თავისუფალი დემოკრატების“ თავმჯდომარემ შალვა შავგულიძემ განაცხადა.

როგორც შავგულიძემ აღნიშნა, საარჩევნო ბლოკს, შესაძლოა, სხვა პოლიტიკური სუბიექტებიც შეუერთდნენ.

„ვფიქრობთ და გვაქვს ისეთი მიმართულება, რომ არჩევნებზე „ევროპულ საქართველოსთან“ ბლოკით გავიდეთ. თუმცა, ამ გადაწყვეტილების საბოლოო ფორმალიზება არ მომხდარა. ჯერ ისიც არ ვიცით, რა საარჩევნო სისტემით გავალთ არჩევნებზე. არც ის არის გამორიცხული, რომ ეს ბლოკი გაფართოვდეს და სხვა სუბიექტებიც შემოგვემატონ. ასე ვფიქრობთ, თუმცა საბოლოო გადაწვეტილება მიღებული არ არის“,- განაცხადა შავგულიძემ.

კითხვაზე, რომელი პარტია, შესაძლოა, შეუერთდეს „ევროპული საქართველოსა“  და „თავისუფალი დემოკრატების“ ბლოკს? შავგულიძე გვპასუხობს, რომ ამ საკითხზე ჯერ კომენტარს ვერ გააკეთებს.

„არ ვიცი, არ მინდა მოვლენებს გავუსწრო. არ არის გამორიცხული, რომ მოხდეს გაფართოება და სხვა სუბიექტიც იყოს ბლოკში“,- განაცხადა შავგულიძემ.

ინფორმაციისთვის, “ევროპულმა საქართველომ” და “თავისუფალმა დემოკრატებმა” პირველად ბლოკი 2019 წელს შექმნეს და მთაწმინდის მაჟორიტარულ ოლქში დეპუტატობის საერთო კანდიდატად შალვა შავგულიძე დააყენეს.

ავტორი: ეკატერინე ზარნაძე