იუსტიციის ყოფილი მინისტრი, თეა წულუკიანი საქართველოს მესამე პრეზიდენტის, მიხეილ სააკაშვილის იმ განცხადებას ეხმაურება, სადაც სააკაშვილმა ევროსაბჭოს სადამკვირვებლო მისიის ხელმძღვანელს რუსეთის აგენტი უწოდა.
როგორც თეა წულუკიანი ამბობს, მსგავსი განცხადებები გამოიწვია იმან, რომ ევროსაბჭოს დელეგაციამ თქვა, ის, რაც რეალურად 31 ოქტომბრის არჩევნებზე მოხდა.
„გუშინ სააკაშვილმა საჯაროდ განაცხადა, რომ ევროსაბჭოს საპარლამენტო ასამბლეის სადამკვირვებლო მისიის ხელმძღვანელი, ბატონი კოქსი არის რუსეთის აგენტი, ის არის რუსეთის კმაყოფაზე მყოფი, ხოლო საპარლამენტო ასამბლეის დადებითი დასკვნა 31 ოქტომბერს ჩატარებული არჩევნების შესახებ რუსეთის უშიშროების ფედერალური სამსახურის ტოლფას დასკვნად გამოაცხადა.
მსგავსი თავდასხმა მისი მხრიდან ალბათ იმან გამოიწვია, რომ ის არ დაემთხვა მის მიერ ტირაჟირებულ ყალბ რეალობას იმასთან დაკავშირებით, რომ თითქოს მან გაიმარჯვა არჩევნებში და არა „ქართულმა ოცნებამ“. ევროსაბჭოს დელეგაციამ თქვა ის, რაც რეალურად იყო, რომ მშვიდობიან პირობებში ჩატარდა არჩევნები, რაც სააკაშვილს არ მოსწონს. მას სხვა გეგმები ჰქონდა, რაც ჩაიფუშა.
ოკუპირებულ ქვეყანაში ანტიდასავლური განწყობების კულტივირება არის მავნებლობა. ჩვენ როდესაც შევალთ პარლამენტში, უკვე იქიდან შევებრძოლებით იმას, რომ ჩვენს ქვეყანაში ვერავინ გააღვივოს ანტიდასავლური გრძნობები“, – განაცხადა თეა წულუკიანმა.
