„პრაიმტაიმნიუსისთვის“ ექსკლუზიურად ცნობილი ხდება „ქართული ოცნების“ მაჟორიტარ კანდიდატთა ნაწილის ვინაობა. როგორც ჩვენთვის გახდა ცნობილი, მმართველი პარტია კახეთის ერთ-ერთ ოლქში მაჟორიტარობის კანდიდატად კახეთის მხარის სახელმწიფო რწმუნებულს, ირაკლი ქადაგიშვილს წარადგენს. ქვემო ქართლში – ბოლნისის მაჟორიტარს, გოგი მეშველიანს, ხოლო რაჭა-ლეჩხუმ-სვანეთში – პრემიერ-მინისტრს, მრჩეველს რეგიონებთან ურთიერთოების საკითხებში, სოზარ სუბარს. ამის შესახებ „პრაიმტაიმნიუსთან” კონფიდენციალურმა წყარომ განაცხადა.
წყაროს ინფორმაციით, „ქართული ოცნება“ მაჟორიტარების კანდიდატებად იუსტიციის მინისტრს, თეა წულუკიანსა და საპარლამენტო უმრავლესობის ლიდერს, მამუკა მდინარაძეს მოიაზრებდა, თუმცა მათი საკითხი ბოლომდე გადაწყვეტილი არ იყო.
„ირაკლი ქადაგიშვილი – კახეთში, გოგი მეშველიანი – ქვემო ქართლის ერთ-ერთ ნაწილში. სოზარ საუბარში წესით, სვანეთში და რაჭაში უნდა იყოს. სერგეენკოს თაობაზე ვერაფერს გეტყვით. მსჯელობა იმის თაობაზე, რომ თეა წულუკიანი სიაში იქნებოდა, იყო, თუმცა ისიც ითქვა, რომ მას იმავე თანამდებობაზე ტოვებდნენ. რაც შეეხება მამუკა მდინარაძეს, უნდათ, რომ მდინარაძე მაჟორიტარი იყოს, თუმცა ეს საკითხი საბოლოოდ გადაწყვეტილი მაინც არ იყო“,- განაცხადა კონფიდენციალურმა წყარომ.
ინფორმაციისთვის, პოლიტიკური გაერთიანება „ქართული ოცნება – დემოკრატიული საქართველო“ მაჟორიტარი დეპუტატობის კანდიდატებს 20 ივლისს დაასახელებს. ამის შესახებ ინფორმაცია პარტიის პრესსამსახურმა გაავრცელა. მათივე ცნობით, პარტიის წინასაარჩევნო კამპანია ოფიციალურად 20 ივლისს დაიწყება.
ავტორი: ეკატერინე ზარნაძე
