საერთაშორისო ურთიერთობების ექსპერტი ნიკა ჩიტაძე „ნაციონალურ მოძრაობას“ პოლიტიკურ სტრატეგიას უწუნებს. როგორც ექსპერტმა „პრაიმტაიმთან“ განაცხადა, ამ პარტიას საკონსტიტუციო ცვლილებების პირველ მოსმენაში მონაწილეობის მიღებაზე უარი არ უნდა ეთქვა, რადგან აღნიშნულ ფაქტს „ქართული ოცნება“ თავის სასარგებლოდ გამოიყენებს.
„მიმაჩნია, რომ „ნაციონალურმა მოძრაობამ“ შეცდომა დაუშვა იმასთან დაკავშირებით, რომ ამ პარტიამ საკონსტიტუციო ცვლილებების კენჭისყრაში მონაწილეობა არ მიიღო.
ამ ფაქტს „ქართული ოცნება“ გამოიყენებს თავის სასარგებლოდ და იტყვის, რომ თვითონ „ნაციონალური მოძრაობა“ ითხოვდა საკონსტიტუციო ცვლილებების ძალაში შესვლას. ისე გამოდის, რომ მათ არ სურთ საკონსტიტუციო ცვლილებების განხორციელება. რეალურად, ამ პარტიას საკონსტიტუციო ცვლილებების განხორციელება სურს, მაგრამ კენჭისყრაში არ მონაწილეობის ფაქტს, „ქართული ოცნება“ თავის სასარგებლოდ გამოიყენებს.
გიორგი რურუას საკითხი, შესაძლოა, დღის წესრიგში დარჩეს, მაშინ „ნაცმოძრაობასთან“ კითხვა მაქვს, თუ გიორგი რურუას საკითხი დგას დღის წესრიგში, რატომ არ დგას ბაჩო ახალაიას საკითხი დღის წესრიგში?! ის ხომ უფრო დიდი ხნის გამავლობაში იმყოფება ციხეში“,- განაცხადა ჩიტაძემ.
ინფორმაციისთვის, დღეს პარლამენტი საკონსტიტუციო ცვლილებებს პირველი მოსმენით უყრის კენჭს.
ავტორი: ეკატერინე ზარნაძე
