გამოძიებას კითხვები არ ჰქონია, – ამის შესახებ გიორგი შაქარაშვილის საქმის ერთ-ერთმა მოწმემ ანა გაბეჩავამ ჟურნალისტებს შსს-დან გამოსვლის შემდეგ განუცხადა.

მისივე თქმით, გამომძიებლებმა მხოლოდ მისი სოციალური ქსელები შეამოწმეს.

„კითხვები არ დასმულა. უბრალოდ ჩემი სოციალური ქსელები შეამოწმეს…ინსტაგრამი”, – ამბობს ანა გაბეჩავა.

ანა გაბეჩავა შსს-ში დაახლოებით 6 საათის განმავლობაში იმყოფებოდა. ასევე დღეს, შსს-ში იმყოფებოდა 18 ივნისის წვეულების მონაწილე ერთ-ერთი არასრულწლოვანი პირი ნ.ხ. ადვოკატის მტკიცებით, კითხვები არ დასმულა ნ.ხ-სთან მიმართებითაც და საგამოძიებო მოქმედებები არასრულწლოვნის კუთვნილ ტელეფონში არსებული მიმოწერის მიზნით ჩატარდა.

შეგახსენებთ, რომ 23 ივნისს, 19 წლის გიორგი შაქარაშვილის ცხედარი 4-დღიანი ძებნის შემდეგ მაშველებმა მდინარე არაგვში იპოვეს.

19 ივნისს, დაახლოებით 11 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები.

ფეხბურთელის გარდაცვალების საქმეზე გუშინ 17 პირი დააკავეს.