თუ არ ვცდები, დღეის მონაცემებით, სადღაც რელიგიის 3 000 მსახურია ქვეყანაში დატესტილი,- ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა.
„მოგეხსენებათ, რომ ამ წლის დასაწყისიდან ე.წ. სისტემურად ტესტირებულთა ჯგუფებს დაემატა რამდენიმე ჯგუფი, მათ შორის მაგალითად, სისტემურად იტესტებიან ტაქსის მძღოლები, გარკვეული პერიოდულობით, იგივე ღია ბაზრობების მოვაჭრეები. ასევე, იყო მოლაპარაკება როგორც მართლამდიდებელ ეკლესიასთან, ისე სხვა კონფესიებთანაც, რომ რელიგიის მსახურებს გარკვეული პერიოდულობით ჩაეტარებინათ ტესტირება.
აქედან გამომდინარე, ეს მიმდინარეობს ყოველდღიურად, თუ არ ვცდები, დღეის მონაცემებით, სადღაც რელიგიის 3 000 მსახურია ქვეყანაში დატესტილი, ეს ძირითადად ხდება ანტიგენზე დამყარებული ტესტებით, ხოლო გარკვეული პერიოდულობით ასევე ტარდება „პისიარ“ კვლევა.
რაც შეეხება თვითონ საპატრიარქოს, მოგეხსენებათ, რომ გუშინდელი ფართომასშტაბიანი ეპიდკვლევა და ტესტირება განპირობებული იყო დადებითი შემთხვევით, რომელიც გვქონდა წლის დასწყისში საპატრიარქოში.
გუშინ ჩვენმა ეპიდემიოლოგთა ჯგუფმა იმუშავა, ჩაატარეს ღრმა ეპიდემიოლოგიური კვლევები ყველასთან, ვინც იყო ამ დადასტურებულ შემთხვევასთან კონტაქტში და შესაბამისად, აღებული იქნა მათი ბიოლოგიური ნიმუშები „პისიარ“ კვლევებისთვის, დღის ბოლოს ყველა აღმოჩნდა უარყოფითი“, – განაცხადა ამირან გამყრელიძე.
ამირან გამყრელიძის თქმით, მათ შორის ტესტირება ჩაუტარდა პატრიარქსაც და მას ვირუსი არ დაუდასტურდა.
„დიახ, გიდასტურებთ, რომ გუშინ დღის მეორე ნახევარში მიღებული იქნა გადაწყვეტილება, მიუხედავად იმისა, რომ პატრიარქს არაფერი აწუხებს ამ თვალსაზრისით, მაინც მიღებული იქნა გადაწყვეტილება, რადგან მაღალია საზოგადოებრივი ინტერესი, ასევე ვთვლით, რომ საჭირო იყო მისი გამოკვლევაც. მოველაპარაკეთ პატრიარქს და მიღებული იქნა გადაწყვეტილება, გამოკვლეულ იქნა პატრიარქი, ისევე როგორც რამდენიმე მაღალი იერარქიის პირი, საბედნიეროდ, პატრიარქი კოვიდუარყოფითია“, – განაცხადა ამირან გამყრელიძემ.
