ჟურნალისტი გიორგი გაბუნია მის შესაძლო ლიკვიდაციაზე პირველ კომენტარს აკეთებს.
გაბუნია „მთავარი არხის“ ეთერში ამბობს, რომ მისთვის საფრთხე მოსალოდნელი იყო და დაახლოებით 2 წელია რაც პირადი დაცვა დაინიშნა.
ჟურნალისტი ასევე აცხადებს, რომ ის მოსალოდნელი საფრთხის შესახებ არაერთხელ გაუფრთხილებიათ, თუმცა კონკრეტულად მისი შესაძლო ლიკვიდაციის შესახებ ინფორმაცია არ ჰქონია.
„ამის შესახებ ინფორმაციას არ ვფლობდი, მაგრამ ჩემმა დაცვამ შეამჩნია, რომ ჩემზე თვალთვალი მიმდინარეობდა. ამის გამო დაცვის გაძლიერება მოხდა. დაახლოებით 2 წელია რაც დაცვა მყავს, მაგრამ ამის შემდეგ დაცვა კიდევ უფრო გაძლიერდა. განსაკუთრებით მას შემდეგ, რაც კადიროვს არც დაუმალავს და ჩემი გამოსვლის შემდეგ თქვა, რომ ვინმე სადმე შემხვდებოდა და რაიმე დამემართებოდა. ამის გარეშეც ნათელი იყო რომ საფრთხე დიდი იქნებოდა. როცა გვარამიამ თქვა რომ ინფორმაცია ჰქონდა, მე არ ვიცოდი, მაგრამ ზოგადად საფრთხე რომ არსებობდა ამის შესახებ ინფორმაცია მქონდა. მანამდეც მოდიოდა ხმები, რომ ფრთხილად ვყოფილიყავი, თუმცა კონკრეტული ინფორმაცია ამ დღემდე არ მქონია“, – ამბობს გაბუნია.
ტელეკომპანია „ფორმულას“ ინფორმაციით, რამდენიმე დღის წინ ქავთარაძის ქუჩაზე ჩატარებული სპეცოპერაციისას დაკავებული ეთნიკურად ჩეჩენი პირი გიორგი გაბუნიას ლიკვიდაციას გეგმავდა.
ამის შესახებ დღეს „მთავარი არხის“ დირექტორმაც ისაუბრა და განაცხადა, რომ ლიკვიდაციის გეგმა გიორგი გაბუნიას სკანდალურ ეთერს უკავშირდება, რა დროსაც გაბუნიამ ვლადიმერ პუტინს აგინა.
