პრემიერ-მინისტრმა, გიორგი გახარიამ კომპანია „ფრონტერასთან“ დაკავშირებით ისაუბრა. როგორც მან აღნიშნა, დღეს საქართველოსთვის ინვესტიციები და ბიზნესპარტნიორობა ყველაზე მნიშნველოვანია, ამიტომ სახელმწიფომ გადაწყვიტა 1%-ზე დავა აღარ დაეწყო.
„ფრონტერასთან“ მიმართებაში საქართველომ საარბიტრაჟო დავა მოიგო. ამის შედეგად აქტივის 99% დაიბრუნა. 1%, რომლის მიმართაც საქართველოს ფორმალურად შეეძლო დაბრუნების პროცესი დაეწყო, ამაზე თქვა უარი. იმიტომ, რომ დღეს საქართველოს ქვეყნის საინვესტიციო კლიმატი და ბიზნესგარემო არის მნიშვნელოვანი და არავის უნდა მივცეთ შესაძლებლობა თუნდაც არასწორი ინფორმაციის გავრცელებით ეს გარემო დააყენოს კითხვის ნიშნის ქვეშ. არავის უნდა მივცეთ შესაძლებლობა სტრატეგიული პარტნიორობა ტარგეტირებული მიზნისთვის გამოიყენონ. ასევე, იქ არიან ქართველი დამსაქმებლები, რომლებიც ამ კომპანიაში მუშაობდნენ და მათი ინტერესებიც უნდა იყოს გათვალისწინებული“,- განაცხადა გიორგი გახარიამ.
ცნობისთვის, ეკონომიკის სამინისტრომ გაავრცელა განცხადება, რომლის მიხედვითაც მთავრობის გადაწყვეტილება კომპანია „ფრონტერას“ საშუალებას აძლევს, აღარ დახარჯოს ძალისხმევა ლობისტების მობილიზებასა და მათთან ურთიერთობაზე, რის ნაცვლადაც, სასურველია, კონცენტრირდეს იმ ვალდებულებების შესრულებაზე, რაც დასაქმებულ პირთა მიმართ დაუგროვდა, გაისტუმროს სახელფასო დავალიანებები, მოაწესრიგოს ურთიერთობა სხვა მრავალ კრედიტორთან და განაგრძოს საქმიანობა საძიებო სამუშაოების განხორციელების კუთხით.
