„ირაკლი კობახიძის განცხადება, ბოიკოტის რეჟიმში მყოფი პარტიები მანდატებთან ერთად დაფინანსებასაც დაკარგავენ, ეს ნიშნავს, რომ ქვეყანაში მყარდება დიქტატურა.“- ამის შესახებ „პრაიმტაიმს“ ლეიბორისტული პარტიის ერთ-ერთმა ლიდერმა გიორგი გუგავამ განუცხადა.
მისი თქმით, ამ მუქარის არ ეშინიათ და ისინი არ აპირებენ შეცვალონ გადაწყვეტილება.
„კობახიძე ზოგიერთ პარტიას გაუქმებით დაემუქრა, დანარჩენებს კი საარსებო საშუალებას მთლიანად მოგისპობთო. სწორედ ეს ნიშნავს დიქტატურისკენ გადადგმულ ნაბიჯს. ამ განცხადებით ცალსახად წარმოაჩინეს თავიანთი მზაკვარი სახე და როგორც უკვე მოგახსენეთ, ქვეყანაში მყარდება ოფიციალურად ოლიგარქიული დიქტატურა.
ჩვენ არ ვაპირებთ შევცვალოთ გადაწყვეტილება, არ ვაპირებთ შევეგუოთ დიქტატურას , არ ვაპირებთ გავაპრაოთ ტოტალურად გაყალბებული არჩევნები, არ დავექვემდებაროთ მათ შანტაჟს. ჩვენ მივმართავთ პარლამენტს მანდატების გაუქმების საკითხთან დაკავშირებით. ეს ღირებულებითი ბრძოლაა და ჩვენ ვიცოდით რა ბრძოლაშიც შევდიოდით. ეს ყოფნა არ ყოფნის საკითხია. ჩვენ თავისუფლებას ვირჩევთ. ისინი ცდილობენ პარტიებმა ფუნქციონირება შეწყვიტონ, მაგრამ იდეას ვერ მოკლავენ ამით.
ეს თანხები გათვლილი არის ოფისის ხარჯებისთვის, კოორდინატორებისთვის, იმ ხალხისთვის ვინც იბრძვის თითოეული ხმისთვის, იბრძვის თავისუფლების იდეისათვის. რა თქმა უნდა დაფინანსების შეწყვეტა პრობლემებს შეუქმნის პარტიას, მაგრამ ეს არ იცვლება თავისუფლებაში. ეს ირაკლი კობახიძის და ბიძინა ივანიშვილის ფული კი არ არის, ეს ქართველი ხალხის ფულია, რომლებიც ხმას გვაძლევს, რომ პარტიამ იფუნქციონიროს. თვითონ იცით რამდენს იღებენ ამ გაყალბებულ არჩევნებში? 20 მილიონს.“ – განაცხადა გიორგი გუგავამ.
