აჭარის მთავრობის სახლთან, ე. წ. „თავისუფლების კვარტალში“, სადაც უკვე ოთხი თვეა გაერთიანებული ოპოზიცია აქციებს მართავს, დღეს საგანგებო ბრიფინგი გაიმართა. როგორც გაერთიანებული ოპოზიციის ლიდერებმა განაცხადეს, ბათუმის „თავისუფლების კვარტალი“ დედაქალაქში გადაინაცვლებს და ბრძოლას დედაქალაქიდან გააგრძელებენ.
მათივე განცხადებით, დღესვე აიღებენ აჭარის მთავრობის სახლთან განლაგებულ კარვებს და თბილისში პარლამენტის შენობასთან გადაინაცვლებენ.
„მეოთხე თვეა უკვე რაც ბათუმში ფუნქციონირებს თავისუფლების კვარტალი. ჩვენს ქვეყანაში შექმნილი ვითარებიდან გამომდინარე, ბათუმის თავისუფლების კვარტალი გადაინაცვლებს საქართველოს დედაქალაქში თავისი სრული ინფრასტრუქტურით და ბრძოლას გააგრძელებს დედაქალაქში.
დიდი მადლობა ყველა იმ ადამიანს, ვინც ერთხელ მაინც მოსულა აქ და ხმამაღალი პროტესტი გამოუხატავს. მთელ საქართველის ვაძლევთ პირობას, რომ იგივე შეუპოვარი ბრძოლა გაგრძელდება დედაქალაქში.
ამ ოთხი თვის განმავლობაში ვფიქრობ, რომ მთელმა საქართველომ ნახა, თუ რა მნიშვნელოვანი საქმეები გაკეთდა აქ.
ბუნებრივია, მოთხოვნები იგივეა, პოლიტიკური.პატიმრების დაუყოვნებლივ გათავისუფლება, რიგგარეშე სამართლიანი არჩევნები, ამის გარეშე ჩვენს ქვეყანას არ ეშველება.
დღეს, ოკუპაციის 100 წლისთავზე ჩვენ ვხედავთ, რომ ოკუპაცია გრძელდება. ერთხელ და სამუდამოდ უნდა დავასრულოთ ოკუპაცია, დავასრულოთ ის კრიზისები, რაც ამ ქვეყანაში არის, გვჭირდება ხალხის ნდობის მანდატით აღჭურვილი ხელისუფლება და ეს მხოლოდ შესაძლოა სამართლიანი არჩევნებით“ – განაცხადა „ერთიანი ნაციონალური მოძრაობის“ ბათუმის ორგანიზაციის თავმჯდომარე გიორგი კირთაძემ.
ავტორი: ნაირა ქობულაძე
