ვფიქრობ, რომ შეთანხმება უნდა შედგეს. ვიმედოვნებ, რომ საერთო გზით შეგვეძლება შეთანხმების მიღება, – ამის შესახებ „სტრატეგია აღმაშენებლის“ ლიდერმა გიორგი ვაშაძემ ოპოზიციისა და ხელისუფლების შეხვედრის დაწყების წინ ჟურნალისტებთან საუბრისას განაცხადა.
„დღეს გადამწყვეტი დღეა და მოდით, დღევანდელ დღეს ვისურვებდი, რომ დაგვერქმია „შეთანხმების დღე“, რომ შეთანხმება ნამდვილად მოხდეს, ისევე როგორც ამას გვთხოვს ჩვენი დასავლელი პარტნიორები, მაგრამ პირველ რიგში ჩვენი საზოგადოება, ქართველი ხალხი.
ვფიქრობ, რომ ამ თვეებმა აჩვენა, რომ ყველას უნდა გვეყოს მაღალი პოლიტიკური კულტურა, რათა შეთანხმებისკენ წავიდეთ. პირველ რიგში ეს არის მნიშვნელოვანი, რომ გაიაზროს „ქართულმა ოცნებამ“ და წინა რაუნდისგან განსხვავებით იმედი მაქვს, რომ არ იქნება დესტრუქციული პოზიცია მათი მხრიდან. პირდაპირ გეტყვით, არ ვიცით საბოლოო დოკუმენტში დეტალურად რა იქნება, მაგრამ მე ვიმედოვნებ, რომ ეს იქნება ობიექტური დოკუმენტი, რომელიც ობიექტურად ასახავს მთელი ამ თვეების მანძილზე მიმდინარე მოლაპარაკებების პროცესს. კიდევ ერთხელ გავუსვამ ხაზს, რომ ძალიან მნიშვნელოვანია, პოლიტიკური პატიმრები გათავისუფლდნენ და ეს არის ალბათ, ერთ-ერთი მთავარი საკითხი დღევანდელი დღის მოლაპარაკებების და ვადამდელ არჩევნებთან მისასვლელი გზა, ამაზე უნდა შევთანხმდეთ. ყველა უნდა ვიყოთ მაქსიმალურად მობილიზებული და ხუმრობით ვიტყვი, რომ ახლა მე რომ მივალ, გასაღებს ავიღებ, ყველა, რომ შემოვა, გადავკეტავ გასაღებით კარს. გადმოგიგდებთ გასაღებს და სანამ არ შევთანხმდებით, უკანგასაღები არ დაგვიბრუნოთ.
მოლოდინი მაქვს, რომ ეს იქნება ახალი დოკუმენტი, ამ ახალ დოკუმენტში იქნება როგორც ვადამდელ არჩევნებთან მისასვლელი გზა, ასევე ორივე პოლიტიკურ პატიმართან დაკავშირებით გადაწყვეტის გზა ნაჩვენები. შესაბამისად, თუ ეს საკითხები იქნება დაკმაყოფილებული ასეთ შემთხვევაში, ვფიქრობ, რომ შეთანხმება უნდა შედგეს. ვიმედოვნებ, რომ საერთო გზით შეგვეძლება შეთანხმების მიღება. მთავარია, რომ 5-ვე საკითხზე შეთანხმება შედგეს, ეს პოზიცია აქვს მედიატორებსაც ამ საკითხთან დაკავშირებით, რადგან შარლ მიშელის საწყისი დოკუმენტი ძალიან ცალსახად ისახავდა 5-ვე პუნქტის გადაწყვეტას და არა 5-დან 3 ან 2 ან 1 პუნქტის გადაწყვეტას. მინდა, რომ დღევანდელი დღე იყოს თანხმობის დღე და ყველანი შევთანხმდეთ“, – განაცხადა გიორგი ვაშაძემ.
