წარსულში „გამარჯვებული საქართველოს“ ერთ-ერთი წევრი გუბაზ სანიკიძე „პრაიმტაიმთან“ ამტკიცებს, რომ პარტია არ დაუტოვებია, რადგან „გამარჯვებული საქართველოს“ წევრი არასდროს ყოფილა, მიუხედავად იმისა, რომ კადრები საპირისპიროზე მეტყველებს.
სანიკიძე აცხადებს, რომ მას თავდაცვის ყოფილ მინისტრთან ირაკლი ოქრუაშვილთან პიროვნული ურთიერთობა აქვს და არა – პოლიტიკური.
გუბაზ სანიკიძე: „გამარჯვებული საქართველოს“ პარტიაში არ ვყოფილვარ, საინიციატივო ჯგუფში ვიყავი. ყველაფერს აქვს თავისი წესი და რიგი. მე ვიყავი საინიციატივო ჯგუფში, მაგრამ არც ყრილობაში მიმიღია მონაწილეობა და არც პარტიის წევრი ვყოფილვარ – ეს თემა დახურულია.
საინიციატივო ჯგუფი აღარ არის, პარტია დაფიქსირებულია, ყრილობა ჩატარებულია, ამიტომ საინიციატივო ჯგუფიც აღარ არის.
– ბატონო გუბაზ, იყო თუ არა ირაკლი ოქრუაშვილი თქვენი პოლიტიკური თანამოაზრე – ამბობთ, რომ მის გუნდში არასდროს ყოფილხართ?
– თანამოაზრე არის ყველა, ვინც ამ ხელისუფლების წინააღმდეგ არის განწყობილი.
მის გუნდში არა ვარ. ჯერ ერთი, რას ნიშნავს მისი გუნდი?! ვიყავით საინიციატივო ჯგუფში ერთად, მერე პარტიის ყრილობა ჩატარდა და მე იმ ყრილობაზე არც დავსწრებივარ და არც პარტიის წევრი ვარ, აქედან გამომდინარე. მორჩა და დამთავრდა, რა პრობლემაა?!
– გუშინ ოქრუაშვილმა თქვენზე დაწერა – „ეს ბიჭი ჩვენთან აღარაა დიდი ხანია და ვისთანაცაა ურჩიეთ, ესეთი სისულელეების ლაპარაკი და მუცლით მეზღაპრეობა ქვეყანას აზიანებს“. როგორ აფასებთ მის განცხადებას?
– არაფერი, ეს მისი ნებაა და მისი მოსაზრებაა. მე პატივს ვცემ მის მოსაზრებას და კომენტარს არ ვაკეთებ. მე და ირაკლი ოქრუაშვილს პიროვნული ურთიერთობა გვაქვს და გვექნება კიდევაც, მაგრამ პოლიტიკური ურთიერთობა ვნახოთ… თუ დიდი გაერთიანება იქნება, შესაძლოა, ერთად ვიყოთ. პარტიის წევრი არც ვყოფილვარ, ამიტომ სადაც არ ვყოფილვარ, იქიდან ვერც გამოვიდოდი.
– ერთ-ერთ მედიაში განაცხადეთ, რომ „ქართული ოცნების“ თავმჯდომარის, ბიძინა ივანიშვილის სატელეფონო საუბრებს აშშ-ს საელჩო უსმენს. რატომ ფიქრობთ ასე?
– ბოდიში მოვიხადე, რადგან არასწორად გამოვთქვი ჩემი მოსაზრება. ეს საკითხი დახურულია.
– აპირებთ თუ არა სამომავლოდ რომელიმე პარტიასთან გაერთიანებას?
– ვნახოთ, არ ვიცი. სიტუაცია განსაზღვრავს, როგორ იქნება. საკონსტიტუციო ცვლილებებს მიიღებენ, არ მიიღებენ, ამიტომ ახლა მარჩიელობა გამოგვივა. რა და როგორ იქნება, ალბათ, ამ ზაფხულში გადაწყდება.
ავტორი: ეკატერინე ზარნაძე
