მთავრობის სახელით გულწრფელი მადლობა მინდა გადაგიხადოთ ყველაფრისთვის, რასაც თქვენ აკეთებთ ჩვენი ქვეყნის ეკონომიკის განვითარებისთვის. ჩვენი მოქალაქეების დასაქმებისა და რეალური განვითარების ფუნდამენტის შექმნისთვის, – ამის შესახებ პრემიერ-მინისტრმა, ირაკლი ღარიბაშვილმა განაცხადა.
„ჩვენ კარგად გვესმის, რომ საკმაოდ რთულ ვითარებაში მოგვიწია ჩვენ ყოფნა და განსაკუთრებით თქვენ დაზარალდით კოვიდპანდემიის გამო, მოსახლეობა, ჩვენი ხალხი, მთლიანად ბიზნესი, რომელიც ძირითადი დამსაქმებელია ჩვენს ქვეყანაში და რეალური დოვლათის შემქმნელი. აქედან გამომდინარე, მთავრობის სახელით გულწრფელი მადლობა მინდა გადაგიხადოთ ყველაფრისთვის, რასაც თქვენ აკეთებთ ჩვენი ქვეყნის ეკონომიკის განვითარებისთვის. ჩვენი მოქალაქეების დასაქმებისა და რეალური განვითარების ფუნდამენტის შექმნისთვის.
რაც შეეხება დღევანდელ ღონისძიებას, ასე ვთქვათ, ეს არის პირველი ოფიციალური შეხვედრა თქვენთან, თუმცა სხვა ფორმატში დავიწყოთ აქტიური შეხვედრები და ვისაუბროთ ყველა იმ საჭირბოროტო საკითხზე, რომელიც თქვენს ბიზნესს აწუხებს. ბუნებრივია, ჩვენ კარგად გვესმის, რომ პრობლემები ბევრია ქვეყანაში. ხვალ გვექნება შესაძლებლობა უფრო ვიწრო ფორმატში ვისაუბროთ ყველა იმ ძირითად საკითხზე, რაც ბიზნესს დაუგროვდა, ყველა იმ პრობლემაზე, რაც თქვენ წინაშე არსებობს. მინდა დაგარწმუნოთ, ჩვენ კარგად გვაქვს გააზრებული ის, რომ საკმაოდ რთულ ვითარებაში ვიმყოფებით, ვინაიდან კოვიდპანდემია სერიოზული გამოწვევაა არა მარტო ჩვენი ქვეყნისთვის, არამედ მთელი მსოფლიოსთვის. ჩვენ გვაქვს კონკრეტული ხედვა, როგორ გამოვიდეთ ამ კრიზისიდან. ჩვენ მაქსიმალურად მოკლე ვადებში უნდა გავააქტიუროთ ვაქცინაცია და ეს იქნება წინაპირობა, რომ მოსახლეობა გამოვიდეს და ეკონომიკა და ბიზნესი ამუშავდეს. მეორე მხრივ ჩვენ უნდა დავიწყოთ აქტიური კოორდინაცია და თანამშრომლობა“, – განაცხადა ირაკლი ღარიბაშვილმა.
