ინდოეთში ათასობით ადამიანი ფართომასშტაბიანი თაღლითობის მსხვერპლი გახდა. კერძოდ, ისინი კოვიდვაქცინის ნაცვლად მარილიანი წყლით აცრეს. ინფორმაციას ამის შესახებ CNN-ი ავრცელებს.
გამოცემის ინფორმაციით, მომხდარში ექიმები და სამედიცინო პერსონალი მონაწილეობდა. მუმბაის პოლიციის უფროსის თქმით, მუმბაისა და მის მიმდებარე რეგიონებში ყალბი ვაქცინით იმუნიზაციის სულ მცირე 12 კამპანია ჩატარდა.
„ვაქცინაციისთვის მარილიან წყალს იყენებდნენ“,- აცხადებს მუმბაის პოლიციის უფროსი.
გამოცემის ცნობით, ყალბი ვაქცინა 2, 500 ადამიანს გაუკეთდა. თაღლითური სქემის ორგანიზატორებმა კი 28 000 აშშ დოლარი გამოიმუშავეს.
პოლიციამ გამოძიება, მოქალაქეთა მიმართვის საფუძველზე დაიწყო, რომლებმაც იმუნიზაციის დამადასტურებელ სერტიფიკატებში ეჭვი შეიტანეს. ექიმები, რომლებიც ყალბი ვაქცინის, სერტიფიკატების და შპრიცების დასამზადებლად ადგილობრივ საავადმყოფოებს იყენებდნენ, უკვე დააკავეს.
ცნობისთვის, მიმდინარე წლის აპრილის თვიდან, კორონავირუსის პანდემიის მეორე ტალღის გამო ინდოეთი საგრძნობლად დაზარალდა.მაისის ბოლოს, ინფიცირების შემთხვევების კლების გამო, სამედიცინო სისტემის დატვირთვა შემსუბუქდა, რამაც მთავრობას იმუნიზაციის მასობრივი პროცესის დაწყების საშუალება მისცა.
