ბათუმში მდებარე მოხუცთა თავშესაფარში 120-დან კორონავირუსი 5 ბენეფიციარს და 1 თანამშრომელს დაუდასტურდა.
თავშესაფარში კარანტინი გამოცხადდა.
თავშესაფრის დირექტორის, დეკანოზ იოანე ბარამიძის ინფორმაციით, ინფიცირებულების ჯანმრთელობის მდგომარეობა სტაბილურია. თუმცა ინფიცირების წყარო უცნობია.
„ხუთი ხანდაზმული დაინფიცირდა, მათი მდგომარეობა სტაბილურად და უსიმპტომოდ მიმდინარეობს. ზოგი ქობულეთში, ზოგი ბათუმის რესპუბლიკურ საავადმყოფოში უნდა იყოს მოთავსებული. ჩვენთან პერიოდულად ჯანდაცვის სამინისტროს წარმომადგენლები მოდიოდნენ და შესაბამის გამოკვლევებს აწარმოებდნენ. ბოლოს რამდენიმე დღის წინ ნიმუშები აგვიღეს და ეპიდემიოლოგებმა რეკომენდაციები გასცეს.
ხუთს დაუფიქსირდა ერთდროულად, მათი ოთახები დაკეტილია, რადგან დეზინფექცია უნდა ჩატარდეს.
ამასთან, დაინფიცირებულია ჩვენი თანამშრომელი, რომელიც 2 სექტემბერს შვებულებაში გავიდა. თანამშრომელს 2 რიცხვამდე ჰქონდა კონტაქტი ამ თავშესაფრის მობინადრეებთან. უცნობია, თანამშრომლიდან დაინფიცირდნენ თუ არა მოხუცები.
ჩაგვიტარდა ტესტი და რეკომენდაციები მივიღეთ. ყველა თანამშრომელს აუღეს ანალიზი და ველოდებით პასუხებს. დაწესებულებაში ამ დროისათვის 120 ხანდაზმული გვყავს “, – აცხადებს დეკანოზი იოანე ბარამიძე.
