თბილისი მერი, კახა კალაძე აფრიკის დასახლებაში განვითარებულ მოვლენებს სოციალურ ქსელში კიდევ ერთხელ ეხმიანება.
როგორ კალაძე აღნიშნავს, აფრიკის დასახლებაში მცხოვრები მამა-შვილის ფოტომ, რომელიც სოციალურ ქსელში გავრცელდა, გული მოუკლა.
„ახლა დავბრუნდი მერიიდან და არ შემიძლია დღესვე არ დავწერო, როგორც მერმა უკვე ვისაუბრე დღევანდელ მოვლენებზე, უბრალოდ ჩემი პირადი პოზიცია უნდა დავწერო- მედიაში რომ დაიწყეს მამა-შვილის ფოტოს გავრცელება როგორც მსხვერპლის, გული მომიკვდა, ტყუილის ტირაჟირებისთვის ბავშვი რატომ-თქო? ისიც კი გავიფიქრე, სახე მაინც დაეფარათ, იქნებ არ უნდა ოჯახს ბიჭუნას ასე გამოჩენა-თქო…. მეგონა მაგ ზღვარს არასდროს უნდა ჩავცდეთ, რომ ანტიპიარისთვის ბავშვები გამოვიყენოთ.
მოგვიანებით, როცა გაირკვა, რომ ბავშვი და მამამისი იქვე ცხოვრობენ, ჩემი და ჩემი შვილების ფოტოები მიაშენეს მათ ფოტოს. ვერც ვბრაზდები, მგონი არც მიკვირს.
ასეთ ადამიანებს რა გითხრათ სხვა? – ეგეთი ქცევა თქვენი არჩევანია. მთავარი ამჯერად ჩემთვის ისაა, რომ როცა შემიძლია დავეხმარო, ვეხმარები, ასე გამზარდეს, ასე ვზრდი ჩემს შვილებს. გმირობაა მარტო კაცი ზრდის 6 შვილს. გმირი მამაა და ჩემთვის ძალიან მნიშვნელოვანია მხარში ამოვუდგე მას. გავარკვიე საღამოსვე რა პირობებში ცხოვრობს და ჩემი პირადი საჩუქარი, ჩემი ოჯახის სახელით, იქნება ბინა ამ ოჯახისთვის.
ამდენი სიძულვილის, ცილისწამების და ტყუილის ფონზე ამ ოჯახის გაბედნიერებაა ჩემთვის დღევანდელი დღის შედეგი“,- წერს კალაძე.
ცნობისთვის, სოციალურ ქსელში გავრცელდა ფოტო, რომელზეც აფრიკის დასახლებაში მცხოვრები მამა-შვილი არიან გადაღებული. ფოტოს ახლავს მცდარი ინფორმაცია, თითქოს მათ სახლი დაუნგრიეს. როგორც გაირკვა, მამა-შვილი იმ კონკრეტულ მისმართზე სხვა მიზნით იმყოფებოდა. მშენებარე ობიექტებიდან კი მათი საკუთრება არც ერთი არ იყო.
