კახეთში ექიმების ნაწილი კორონავირუსის საწინააღმდეგო ვაქცინაციის ჩატარებაზე უარს ამბობს.
ექიმები, რომლებიც კორონავირუსზე აცრას არ ჩაიტარებენ, „ასტრაზენეკას“ ვაქცინის გვერდით მოვლენებს შეუსწავლელად თვლიან.
გურჯაანის „ჯეოჰოსპიტალის“ ექიმი, მამუკა სააკაშვილი, „პრაიმტაიმნიუსთან“ ამბობს, რომ ვაქცინის შესახებ ინფორმაცია არ აქვს.
„ჯერ დაგვპირდნენ, რომ „ფაიზერის“ ვაქცინას შემოიტანდენ. ახლა აღმოჩნდა, რომ სხვა შემოვიდა. იყო ქვეყნები, სადაც „ასტრაზენეკას“ წარმოებულმა ვაქცინამ თრომბოემბოლიები გამოიწვია. მე ვფიქრობ, ხომ არ არის საქართველოში შემოსული პრეპარატი, იმ ვაქცინის ჯგუფიდან, ან სულაც იქიდან გადმოსროლილი. ამიტომ მე უარს ვამბობ ვაქცინის გაკეთებაზე, სანამ დარწმუნებული არ ვიქნები მის უსაფრთხოებაში“,- განაცხადა სააკაშვილმა.
„ასტრაზენეკას“ ვაქცინას, კახეთში, დღეს ჯანდაცვის საზოგადოებრივ ცენტრებში ელოდებიან. ვაქცინაცია 15 მარტს, თელავის რეფერალურ ჰოსპიტალში დაიწყება.
კახეთში კოვიდ 19 -ზე ვაქცინაციისთვის სულ 13 დაწესებულებაა დარეგისტრირებული. მათ შორის, ოთხი თელავში, სამი საგარეჯოში, თითო კი დანარჩენ ექვს მუნიციპალიტეტში.
მთლიანად რეგიონში, 3 ათასზე მეტი სამედიცინო პერსონალის აცრა იგეგმება.
ავტორი: ხათუნა გულიაშვილი
