„ქართული ოცნების““ თავმჯდომარე, მამუკა მდინარაძე აფრიკის დასახლებაში შენობების დემონტაჟის ფაქტს ეხმაურება.
როგორც მდიანრაძე ამბობს, გუშინ არც ერთი ადამიანის საცხოვრებელი ბინიდან გამოსახლება არ მომხდარა.
„სახელმწიფო უკანონობაზე ვერც თვალს დახუჭავს და მით უმეტეს, ვერც უკანონობას დააკანონებს, ისევე როგორც ვერ წაახალისებს მას. „ქართული ოცნების“ ხელისუფლება შესაძლებლობების მაქსიმუმის ზღვარზე ეხმარება ყველა ადამიანს, რომელსაც არ აქვს საცხოვრისი. გუშინ არ მომხდარა არც ერთი ადამიანის საცხოვრებელი ბინიდან გამოსახლება – ეს შეგნებულად გავრცელებული ცრუ ინფორმაციაა.
ყველა შენობა, რომლის დემონტაჟიც მოხდა, იყო უკანონო და ამავე დროს მშენებარე (და არა დასრულებული) ნაგებობა. უკანონო მშენებარე სახლების ყველა მესაკუთრე წინასწარ იყო გაფრთხილებული მოსალოდნელი სამართლებრივი რეაგირების შესახებ. კახი ყოველთვის გამორჩეულია იმით, რომ შეუძლია იყოს სახელმწიფო ინტერესების გამტარებელი, ძალიან პრინციპული და ამავდროულად ყველა გააკვირვოს თავისი ჰუმანურობით“, – აცხადებს მდიანრაძე.
შეგახსენებთ, გუშინ აფრიკის დასახლებაში, ყოფილი ქარხნის ტერიტორიაზე დრამატულად განვითარდა მოვლენები. თბილისის მუნიციპალური სამსახურმა უკანონოდ აშენებული საცხოვრებლების დემონტაჟი მოახდინა, რასაც ადგილობრივების გაღიზიანება მოჰყვა. ადგილობრივებსა და სამართალდამცველებს შორის ფიზიკურ დაპირისპირებასაც ჰქონდა ადგილი.
