კალიფორიაში მცხოვრები 45 წლის ექთანი, Pfizer-ის კორონავირუსის ვაქცინის გაკეთებიდან ერთ კვირაზე მეტი ხნის შემდეგ, კორონავირუსით დაინფიცირდა. ინფორმაციას ამის შესახებ Reuters-ი ავრცელებს.

მეთიუმ კორონავირუსის ვაქცინა 18 დეკემბერს გაიკეთა. მან ABC NEW-ს განუცხადა, რომ ვაქცინაციის შემდეგ ერთი დღის განმავლობაში მკლავის ტკივილი აწუხებდა, სხვა გვერდითი ეფექტები არ გამოვლენილა.

შობის ღამეს მეთიუმ თავი შეუძლოდ იგრძნო. მას კუნთების ტკივილი აწუხებდა და დაღლილობას გრძნობდა. 26 დეკემბერს მეთიუს ტესტის პასუხი კორონავირუსზე დადებითი აღმოჩნდა.

სან დიეგოს საოჯახო ჯანდაცვის ცენტრის ინფექციონისტის, ქრისტიან რამერსის განცხადებით, მოვლენების ეს სცენარი მოულოდნელი სულაც არ ყოფილა.

„კლინიკური კვლევებიდან ჩვენთვის ცნობილია, რომ ვაქცინის მიღების შემდეგ ორგანიზმს დამცველობითი ფუნქციის გამოსამუშავებლად 10-14 დღე სჭირდება.  95%-იანი შედეგის მისაღებად ვაქცინის მეორე დოზის გაკეთებაა საჭირო“,- აცხადებს რამერსი.