“ხელისუფლებამ პოლიტიკური ნიშნით ზეწოლის, მუქარისა და დაშინების მეთოდები გაამრავალფეროვნა. 2011-12 წლების მსგავსად, მთავრობა ბიზნესზე ზეწოლისა და ოჯახის წევრების დაშინების მეთოდებს დღესაც აქტიურად იყენებს”,- ამის შესახებ პარტია „საქართველოსთვის“ ერთ-ერთმა ლიდერმა, ნათია მეზვრიშვილმა განაცხადა.

„სამწუხაროა, მაგრამ ხელისუფლება პოლიტიკური ნიშნით დევნისთვის სუს-ს, ძალოვან უწყებებს, პოლიციას და შემოსავლების სამსახურს იყენებს. საგამოძიებო უწყებები, რომლებიც ამ ფაქტებზე რეაგირებას უნდა ახდენდნენ, ხელისუფლებას ჩვენი პარტიის წინააღმდეგ ბრძოლაში ჰყავს ჩართული. ჩვენ თითოეული რიგითი თანამშრომლის, ვისაც ამის გაკეთება უწევს, კარგად გვესმის. სწორედ ამიტომ, ბუნებრივია, ამ პროცესებზე პასუხისმგელობას პოლიტიკურ ხელმძღვანელობას ვაკისრებთ.

განსაკუთრებით მძიმეა, რომ ხელისუფლება რიგით საჯარო მოხელეთა „ფეისბუკ“ „პოსტებს“ და „ლაიქებს“ დასდევს. მაგალითად, გურიაში ერთ-ერთი ჩვენი მხარდამჭერის ახლობელი სამსახურიდან იმის გამო გაუშვეს, რომ მან გიორგი გახარიასთან ერთად ფოტო გადაიღო“, – განაცხადა მეზვრიშვილმა.