პოლიტიკის ექსპერტი გია ხუხაშვილი „ევროპულ საქართველოსა“ და „ნაციონალურ მოძრაობას“ ანტისახელმწიფოებრივ ქმედებაში ადანაშაულებს.
როგორც ხუხაშვილმა „პრაიმტაიმთან“ განაცხადა, პარტიებს საკონსტიტუციო ცვლილებების კენჭისყრაში მონაწილეობაზე უარი არ უნდა ეთქვა.
„ნაციონალურ მოძრაობასა“ და „ევროპულ საქართველოს“ აქვთ პრეტენზია შეთანხმების შესრულებაზე, მაგრამ საკონსტიტუციო ცვლილებებზე ხელის არ მოწერა, მინიმუმ არასახელმწიფოებრივი ფენომენია.
დიდი საკონსტიტუციო პროცესი მხოლოდ მათი მონაპოვარი კი არა, სახელმწიფოს მონაპოვარია, ამ პროცესის საფრთხის დაყენებაში ვერც პოლიტიკურ ლოგიკას ვხედავ და ვერც სახელმწიფოებრიობას“,- განაცხადა ხუხაშვილმა.
კითხვაზე, რეალურად, სურს თუ არა „ნაციონალურ მოძრაობასა“ და „ევროპულ საქართველოს“ საკონსტიტუციო ცვლილებების ჩაგდება?! ხუხაშვილი გვპასუხობს, რომ აღნიშნული უფრო „ნაციონალური მოძრაობის“ ინტერესშია.
„რაღაც გაგებით, „ნაციონალურ მოძრაობასთან“ დაკავშირებით, შემიძლია დავინახო გარკვეული ლოგიკა, რომ მათ არ აწყობთ საკონსტიტუციო ცვლილებების განხორციელება.
„ევროპული საქართველო“ არ მაქვს მხედველობაში, რადგან საკონსტიტუციო ცვლილებების ჩაგდება მათ ინტერესებში მაინც და მაინც არ უნდა შედიოდეს.
„ნაციონალური მოძრაობა“ ამ საკონსტიტუციო ცვლილებებით კარგავს მთავარი ოპოზიციური ცენტრის როლს, რაც მათთვის საფრთხის შემცველია. ასე, რომ ამ პროცესში „ნაციონალური მოძრაობისა“ და „ქართული ოცნების“ ინტერესები ემთხვევა“,- განაცხადა ხუხაშვილმა.
დღეს, პარლამენტმა საკონსტიტუციო ცვლილებები მეორე მოსმენით დაამტკიცა.
ნახეთ, სხვა პოლიტიკური შეფასებები:
- მამუკა მდინარაძე ამბობს, რომ ოპოზიცია 8 მარტის შეთანხმებიდან გავიდა
- „ნაციონალური მოძრაობა“ თავის განშტოებებით, ეს არის კრიმინალური და ანტიდასავლური ძალა – კობახიძე
- „ქართული ოცნების“ ხელისუფლებამ გააძლიერა ქვეყნის სტაბილურობა, უსაფრთხოება და დემოკრატული განვითარება – თალაკვაძე
- კანონპროექტს საფრთხე აღარ ემუქრება – თამარ ჩუგოშვილი
პარლამენტში მესამე მოსმენით საკონსტიტუციო ცვლილებებს კენჭს ორშაბათს უყრიან.
ავტორი: ეკატერინე ზარნაძე
