შერიგებისა და სამოქალაქო თანასწორობის საკითხებში ყოფილი სახელმწიფო მინისტრი პაატა ზაქარეიშვილი გაერთიანებული ოპოზიციის საერთო კანდიდატების შესახებ აცხადებს, რომ მათ არჩევნებში გამარჯვების თანაბარი შანსი აქვთ.
როგორც ზაქარეიშვილმა “პრაიმტაიმთან“ განაცხადა, მთავარია, გაერთიანებულმა ოპოზიციამ ყველა კანდიდატის მხარდაჭერა საქმით დაამტკიცოს.
„ყველა კანდიდატს გამარჯვების თანაბარი შანსი აქვს. მთავარია, ოპოზიცია ამ კანდიდატებზე როგორ იმუშავებს – იქნება თუ არა განხეთქილება ამა თუ იმ კანდიდატის გამო. კანდიდატი იმ შემთხვევაში გაიმარჯვებს, თუ მას ესა თუ ის პოლიტიკური ძალა მხარში დაუდგება.
ეს ის ხალხია, რომელიც კომპრომისის შედეგია. შეიძლება, უკეთესი ვარიანტებიც ყოფილიყო, მაგრამ სხვები ვიღაცისთვის მიუღებელი შესაძლოა, ყოფილიყო. კომპრომისული კანდიდატი ყოველთვის იდეალური არ არის“,- განაცხადა ზაქარეიშვილმა.
ზაქარეიშვილის განცხადებით, გამორიცხული არ არის, რომ ოპოზიციის კანდიდატს, შალვა ნათელაშვილს ნაძალადევში იუსტიციის მინისტრი თეა წულუკიანი დაუპირისპირდეს.
„რატომ არ უნდა გახდეს წულუკიანი ნაძალადევის მაჟორიტარი, თუ იქ ერთხელ უკვე გაიმარჯვა?! ლოგიკურად გამორიცხული არ არის“,- განაცხადა ზაქარეიშვილმა.
ინფორმაციისთვის, გაერთიანებულმა ოპოზიციამ თბილისის 6 მაჟორიტარულ ოლქში საერთო კანდიდატები წარადგინა: ვაკეში – ელენე ხოშტიარია, გლდანში – ნიკა მელია, ისანში – გიორგი ვაშაძე, სამგორში – ლევან ხაბეიშვილი, მთაწმინდაზე – შალვა შავგულიძე და ნაძალადევში – შალვა ნათელაშვილი.
ავტორი: ეკატერინე ზარნაძე
