კორონავირუსის შემთხვევების გამოვლენის გამო ქობულეთის პირველი ბაღი დროებით დაიხურა. აჭარის საზოგადოებრივი ჯანდაცვის ცენტრის ინფორმაციით ინფიცირებულია მოზარდი და ერთ-ერთი თანამშრომელი.
„ეპიდემიოლოგებმა რისკების შეფასების შედეგად მიიღეს გადაწყვეტილება ბაღი 12 დღის დაიხუროს. განმეორებითი ტესტირების შედეგების შეფასების შემდეგ მიიღებენ ეპიდემიოლოგები ბაღის გახსნის გადაწყვეტილებას“, – აცხადებენ უწყებაში.
არსებული ინფორმაციით, ინფიცირებული აღმზრდელი და მოზარდი ერთმანეთთან ნათესაურ კავშირში იმყოფებიან.
ქობულეთის მუნიციპალიტეტში ეს უკვე მეორე ბაღი დროებით დაიხურა. რამდენიმე დღის წინ ქობულეთის მეხუთე ბაღშიც დაფიქსირდა კორონავირუსით ინფიცირების შემთხვევები და ეპიდემიოლოგების რეკომენდაციით დროებით შეჩერდა სააღმზრდელო პროცესი.
კოვიდ 19-ის შემთხვევების დაფიქსირების გამო დინტანციურ სწავლებაზე ბათუმში პირველი საჯარო სკოლის მეცხრე კლასის ერთი ჯგუფი და “ევრო 2000”-ის მეხუთე კლასი გადავიდა.
ამ ეტაპზე აჭარაში ორი სკოლა და სამი ბაღი არის დროებით დახურული.
ავტორი: ნაირა ქობულაძე
