კორონავირუსის დამარცხებას 1 წელი დასჭირდება, მასთან ერთად ცხოვრებას უნდა მივეჩვიოთ, – ამის შესახებ დაავადებათა კონტროლის ეროვნული ცენტრის ხელმძღვანელი, ამირან გამყრელიძე აჭარის საზოგადოებრივი მაუწყებლის ეთერში აცხადებს.

„კორნავირუსის გარკვეული შემთხვევები გვექნება და ჩვენ ამას უნდა მივეჩვიოთ. როცა ვსაუბრობთ „თანაცხოვრება კორონავირუსთან ერთად ხანგრძლივი პერიოდის განმავლობაში“ სულ მცირე, ერთი წელი მაინც, ამას უნდა მივეჩვიოთ და შესაბამისად განვეწყოთ – კარგად იცით რას ნიშნავს განწყობის თეორია. ძალიან არ უნდა შეგვეშინდეს, რადგან ეს ვირუსი არ გაქრება არსად, ჩვენთან ერთად იქნება. უნდა დავიცვათ თავები და მასთან ერთად ვიცხოვროთ“, – ამბობს გამყრელიძე.

კითხვაზე, იგეგმება თუ არა რეგულაციების კიდევ უფრო გამკაცრება, გამყრელიძე პასუხობს:

„გარკვეული რეგულაციები უკვე გამკაცრდა, თუნდაც აჭარაში – სწავლა ბათუმსა და ქობულეთში ვირტუალური ფორმით დაიწყება, 2 კვირის განმავლობაში დისტანციურად. ხვალ საკოორდინაციო საბჭოა და იქნება კიდევ მსჯელობები, მაგრამ ჩაკეტვა საერთოდ აღარ მოხდება, რადგან ჯანმთელობის პოლიტიკა სრულად მართვადია და შესაძლებელია, რომ ეკონომიკა აღარ ჩავკეტოთ, რადგან ხალხს ცხოვრება უნდა“, – აცხადებს გამყრელიძე.