ბიზნესმენი ლევან ვასაძე აცხადებს, რომ დაახლოებით ორი თვის წინ, რუსეთის საგარეო საქმეთა სამინისტროში მომუშავე ერთ-ერთ ანალიტიკოსს შეხვდა. ამის შესახებ მან „ღამის კურიერის“ ეთერში ისაუბრა, თუმცა პიროვნების სახლი და გვარი არ დაუსახელებია.
როგორც ბიზნესმენი ამბობს, რუს ანალიტიკოსთან სადილობის დროს საუბარი რუსეთ-საქართველოს შორის არსებულ ურთიერთობას შეეხო.
„მე მოგიყვანთ თქვენ ჩემი ცხოვრებიდან ერთ-ერთ უახლეს მაგალითს. მე ვსადილობდი ერთ-ერთ წამყვან ინტელექტუალთან, ანალიტიკოსთან, რომელიც მუშაობს რუსეთის საგარეო საქმეთა სამინისტროში. ეს, თავისთავად, კრიმინალია უკვე ბევრი ქართველისთვის – რას ჰქვია, რუსულად ლაპარაკობ და რუს ანალიტიკოსს ესაუბრები?! მაგრამ, წარმოიდგინეთ, მე ერთ-ერთი კაცი ვარ იმ 700 000 ქართველიდან, ვინც მოძრაობს რუსეთში და საუბრობს რუსებთან – დაგვიბრუნეთ აფხაზეთი და ცხინვალი და ამის სანაცვლოდ, ვიყოთ მეგობრები…
სრული პასუხისმგებლობით ვაცხადებ, ეს კაცი მე მეუბნება – სიმართლეს ამბობს თუ არა, ამას არ აქვს მნიშვნელობა, მე მაქვს მიზეზები, მიმაჩნდეს, რომ ეს კაცი სიმართლეს მეუბნება – ჩვენ ვლაპარაკობდით, რა შეიძლება გაკეთდეს, რომ რამენაირად დაიწყოს დათბობა ქართულ-რუსული ურთიერთობების საზოგადოებრივ დონეზე მაინც. მაგალითად, გაუქმდეს ვიზები და ეს კაცი მეუბნება – იმ დღეებში, როდესაც გამზადებული იყო გადაწყვეტილება ამ ვიზების გაუქმებისა ჩვენი მხრიდან და რუსეთის პრეზიდენტს უნდა გამოეცხადებინა ამ გადაწყვეტილების შესახებ, გამოვიდა თქვენი ე.წ. ერთ-ერთ ჟურნალისტი და დედა აგინა მას პირდაპირ ეთერში და ბუნებრივია, ეს გადაწყვეტილება გაუქმდა, “ – ამბობს ლევან ვასაძე.
წამყვანის კითხვაზე, თუ როდის შედგა ეს შეხვედრა, ლევან ვასაძე პასუხობს, რომ ეს იყო, დაახლოებით, 2 თვის წინ.
