„სიმართლის დადგენა კი არ უნდა ვინმეს, ზარალის მიყენება უნდა ეკლესიისათვის”, – ასე აფასებს ვიცე-სპიკერი გია ვოლსკი ნინოწმინდის პანსიონის ირგვლივ არსებულ მოვლენებს.
გია ვოლსკიმ მეუფე სპირიდონს თავდადებისთვის და ბავშვების კეთილდღეობაზე ზრუნვისთვის მადლობა გადაუხადა.
“თუკი რაიმე გადახრა არსებობდა, რა საკვირველია, პირველმა ამის წინააღმდეგ უნდა გაილაშქროს და გაილაშქრებს კიდეც ეკლესია, რომლის ყველა პრინციპს ეწინააღმდეგება ძალადობა. მაგრამ ის სკანდალური, ისტერიკული პოზიცია, რაც ეკლესიის წინააღმდეგ მიმდინარეობს, მიუთითებს იმაზე, რომ სიმართლის დადგენა კი არ უნდა ვინმეს, ზარალის მიყენება უნდა ეკლესიისათვის.
მადლობა უნდა ვუთხრათ ყველას, მეუფე სპირიდონსაც თავისი თავდადების გამო და ყველა სასულიერო პირს, ვინც ამ ხნის განმავლობაში ბავშვებს კეთილსინდისიერად და სიყვარულით ემსახურებიან. ცალკეული გადახრა, თუ ეს დაშვებული იქნა, არის ჩვენი საზოგადოების საზრუნავი, მაგრამ აქ განსხვავებულობა არ უნდა იყოს. სახალხო დამცველს, ეკლესიის და სახელმწიფოს წარმომადგენელს ერთი პოზიცია უნდა ჰქონდეს – ბავშვის ინტერესები უპირველეს ყოვლისა”, – თქვა გია ვოლსკიმ.
ხმაურიანი განცხადებები, სკანდალები, დაპირისპირებები, ჭორები – ყველაფერი მეუფე იაკობის შესახებ
2021-06-15
ხმაურიანი განცხადებები, სკანდალები, დაპირისპირებები, ჭორები – ყველაფერი მეუფე იაკობის შესახებ
ცნობისთვის, ნინოწმინდის პანსიონი მედიის ყურადღების ცენტრში მეუფე სპირიდონის გადაწყვეტილების შემდეგ მოექცა. მეუფემ სახალხო დამცველს ბავშვთა სახლში შესვლის უფლება არ მისცა. მიზეზად კი მისი „გაუკუღმართებული” იდეოლოგია დაასახელა. სახალხო დამცველი კი ნინოწმინდის პანსიონში არსებულ დარღვევებზე ალაპარაკდა.
ამასთან, გამოჩნდნენ პანსიონის ბენეფიციარები, რომლებიც დასჯის სასტიკ მეთოდებზე ღიად საუბრობენ.
თბილისის საქალაქო სასამართლოს გადაწყვეტილებით, ნინოწმინდის პანსიონი შშმ ბავშვებმა დატოვეს. პანსიონი მშობლებისა და ბენეფიციარების გადაწყვეტილებით კიდევ რამდენიმე ბავშვმა დატოვა და ამ დროისთვის ნინოწმინდის ბავშვთა სახლში 23 აღსაზრდელია.
საპატრიარქოსა და გაეროს ბავშვთა ფონდის წარმომადგენლის, ღასან ჰალილის და საქართველოს მთავრობის ერთობლივი მოლაპარაკებების შედეგად გადაწყდა, რომ ნინოწმინდის პანსიონს დროთა განმავლობაში მცირე ტიპი ბავშვთა სახლები ჩაანაცვლებენ.
