ინტენსიურად თოვს მაღალმთიან აჭარაში. თოვლის საფარი დაახლოებით, 50-60 სანტიმეტრს აღწევს.
აჭარის საავტომობილო გზების დეპარტამენტის ინფორმაციით, ინტენსიურ რეჟიმში ხორციელდება ადგილობრივი მნიშვნელობის საავტომობილო გზების თოვლის საფარისგან გაწმენდითი სამუშაოები და ამ დროისთვის მაღალი გამავლობის ავტომობილებს თავისუფლად შეუძლიათ გადაადგილება.
ქედის მერიის ინფორმაციით, ქედაში ამ დრომდე ინტენსიურად თოვს, თოვლის საფარი დაბლობში 20 სმ-ია, მაღალ სოფლებში 70 კი სმ- ს აღწევს. მაღალი გამავლობის ავტომობილებისთვის მოძრაობა შესაძლებელია.
„აჭარის საგზაო დეპარტამენტი დილიდან აწარმოებს საავტომობილო გზების გაწმენდით სამუშაოებს, ამ ეტაპზე ექვსი მიმართულებით. მუნიციპალიტეტს ელექტროენერგია ამ დროისთვის ნაწილობრივ მიეწოდება, მიმდინარეობს ენერგო-პრო ჯორჯიას მობილური ჯგუფების მიერ აღდგენითი სამუშაოები“, – აცხადებენ მერიაში.
ხულოს მერიის ინფორმაციით, უხვ ნალექს მუნიციპალიტეტში პრობლემები არ შეუქმნია.
„ხულოს მუნიციპალიტეტში გზებზე თოვლის წმენდის პროცესი დილიდან ინტენსიურ რეჟიმში მიმდინარეობს როგორც ცენტრალურ, ასევე ადგილობრივი მნიშვნელობის საავტომობილო გზებზე. თოვლის საფარი დაბალი ზონის სოფლებში 20 სმ-ია, მაღალ სოფლებში 50-60 სმ-ს აღწევს. მუნიციპალიტეტის ადმინისტრაციულ ერთეულებში მაღალი გამავლობის ავტომობილებით გადაადგილება შესაძლებელია. ელექტროენერგია სრული დატვირთვით, ყველა აბონენტს მიეწოდება“, – აცხადებენ ხულოს მერიაში.
შუახევის მუნუციპალიტეტში თოვლის საფარი დაბალი ზონის სოფლებში 20-30სმ, ხოლო მაღალ ზონაში 30-50 სმ-ია.
ბათუმი-ახალციხის საავტომობილო გზის შუახევის მონაკვეთზე ტრანსპორტით გადაადგილება თავისუფალია. ადმინისტრაციულ ერთეულებამდე შესაძლებელია მაღალი გამავლობის ტრანსპორტით მოძრაობა.
„საავტომობილო გზების დეპარტამენტი, ინტენსიურ რეჟიმში ახორციელებს ადგილობრივი მნიშვნელობის საავტომობილო გზების თოვლის საფარისგან გაწმენდით სამუშაოებს. ამ დროისთვის სამუშაოები ხეობების მიმართულებით მიმდინარეობს. მუშაობს 13 ერთეული ტექნიკა. საგანგებო რეჟიმში აგრძელებს მუშაობას შუახევის მუნიციპალიტეტის მერიასთან არსებული საგანგებო სიტუაციების მართვის შტაბი. მოქმედებს ცხელი ხაზი 08 000 000 08. მეწყერული პროცესები არ ფიქსირდება. ოპერატიულად განიხილება წამოჭრილი საკითხები“, – აცხადებენ უწყებაში.
სინოპტიკოსების ინფორმაციით, თოვა აჭარის მაღალმთიან სოფლებში დღესაც გაგრძელდება.
ავტორი: ნაირა ქობულაძე
