მაიკ პომპეოსთან შეხვედრაზე 2020 წლის საპარლამენტო არჩევნები არ განგვიხილავს, – ამის შესახებ არასამთავრობო ორგანიზაცია „უფლებები საქართველოს“ წარმომადგენელმა, კახა წიქარიშვილმა პომპეოსთან შეხვედრის დასრულების შემდეგ განაცხადა.
წიქარიშვილის თქმით, პომპეოსთან შეხვედრისას მთავარი სასაუბრო თემა სასამართლო და იქ არსებული პრობლემები იყო.
„ძალიან ცოტა ვისაუბრეთ არჩევნებთან დაკავშირებით, კერძოდ საარჩევნო დავებზე, თუ როგორ იქცევა სასამართლო ხშირად მიკერძოებულად. მისი მხრიდან იყო შეკითხვები სასამართლოში არსებულ ვითარებასთან დაკავშირებით. ჩვენი მთავარი საუბრის თემა იყო სასამართლო. მე პირადად ვთქვი, რომ წინა ხელისუფლების დროს ჩვენ გვქონდა მახინჯი სასამართლო სისტემა და ეს მახინჯი სასამართლო სისტემა „ქართულმა ოცნებამ“ დააკანონა 40-წლიანი პერსპექტივით“, – განაცხადა კახა წიქარიშვილმა.
შეგახსენებთ, 17-18 ნოემბერს აშშ-ის სახელმწიფო მდივანი, მაიკ პომპეო საქართველოს ეწვია. ვიზიტის ფარგლებში სახელმწიფო მდივანი საქართველოს პრეზიდენტს – სალომე ზურაბიშვილს, საგარეო საქმეთა მინისტრს – დავით ზალკალიანს, პრემიერ-მინისტრს – გიორგი გახარიას, საქართველოს კათოლიკოს-პატრიარქს – ილია II-სა და არასამთავრობო ორგანიზაციების წარმომადგენლებს შეხვდა.
