გავრცელებულ ინფორმაციას, რომ გურიაში საარჩევნო უბნებზე თვითიზოლაციაში მყოფი პირები მიიყვანეს, საპარლამენტო უმრავლესობის ლიდერი მამუკა მდინარაძე არ ადასტურებს.

მისივე თქმით, ოჯახი რომელიც არჩევნებზე იმყოფებოდა, მათ თვითიზოლაციის ვადა ორი დღის წინ გაუვიდათ.

მდინარაძემ მედიას მიმართა და მოუწოდა ნუ ჩაებმებიან ინფორმაციის გასავრცელებლად მსგავს სქემაში.

„საცერივით გამოდის ინფორმაციები „ნაციონალური მოძრაობიდან“ და მივიღეთ ინფორმაცია, რომ ჩაიშალა დავალება, იქნებ როგორმე გავრცელებულიყო ინფორმაცია, თითქოს „ქართული ოცნება“ საარჩევნო უბნებზე თვითიზოლაციაში მყოფ პირებს დაატარებს.

ჩვენი წარმომადგენლები აკვირდებოდნენ, უბნებზე ეს ყალბი ინფორმაცია ვინმეს არ გაევრცელებინა. ნახევარი საათის განმავლობაში ასეთი ინფორმაცია ვერ გავრცელდა, თუმცა „ტვ პირველის“ ეთერში ჟურნალისტი ლაითურის საარჩევნო უბნიდან ჩაერთო, თითქოს ლაითურის საარჩევნო უბანზე მიიყვანეს იზოლაციაში მყოფი პირები.

საუბარია, დავითაძეების ოჯახზე, რომლებიც იზოლაციაში მართლაც იმყოფებოდნენ. ორი დღის წინ მათ გაუვიდათ იზოლაციაში ყოფნის ვადა. მხოლოდ და მხოლოდ იმ მიზნით, რომ შეაშინონ ამომრჩეველი, „ნაცმოძრაობა“ და მისი დანაყოფები უკვე პანიკაში არიან, ამ მიზნით შეგნებულად გავრცელდა არასწორი, ცრუ ინფორმაცია“, – განაცხადა მამუკა მდინარაძემ.

ცნობისთვის, გურიაში საარჩევნო კომისიის წარმომადგენლის ზვიდ თენიაშვილის განცხადებით, პირმა რომელიც იზოლაციაში იმყოფებოდა უბანზე მივიდა და ხმა მისცა.

„პროცედურულ დარღვევას ჰქონდა 11-ე უბანზე ადგილი. საუბნო საარჩევნო კომისიის თავმჯდომარეს, თვითიზოლაციაში მყოფი პირის ცალკე სიაში შეყვანა დაავიწყდა, რის გამოც, იგი საარჩევნო უბანზე ხმის მიმცემთა სიაში აღმოჩნდა, ახლა გაგზავნილი გვყავს ჩვენი ჯგუფი და ახსნა განმარტებით ბარათს დაწერს თავჯდომარე თუ რა მოხდა“, – აღნიშნა თენიეშვილმა.

ლაითურის საარჩევნო უბანზე ხმის მიცემის პროცედურა დროებით შეჩერებულია, რადგან ცესკოს წარმომადგენლები ადგილზე სიტუაციის გასარკვევად მივიდნენ.

დაავადებათა კონტროლის ეროვნული ცენტრის გურიის რეგიონის ხელმძღვანელმა არჩილ მჟავიმ აღნიშნულ ფაქტთან დაკავშირებით განაცხადა, რომ თვითიზოლაციაში მყოფი პირი უნდა იყოს სახლში და არა ბაზარში და მით უმეტეს არჩევნებზე.

დღეს, 31 ოქტომბერს საქართველოში საპარლამენტო არჩევნები მიმდინარეობს. ამომრჩეველთა ერთიან სიაში სულ 3 205 634 ამომრჩეველია რეგისტრირებული. ქვეყნის მასშტაბით გახსნილია 3 657 საარჩევნო უბანი. იმ ამომრჩევლებისთვის, რომლებიც იმყოფებიან სამკურნალო დაწესებულებებში, კარანტინსა და თვითიზოლაციაში, ცალკე დამატებით შეიქმნა 127 სპეციალური საარჩევნო უბანი.

არჩევნებში 48 პოლიტიკური პარტია და ორი საარჩევნო ბლოკი მონაწილეობს.

ყველა ინფორმაცია საპარლამენტო არჩევნებთან დაკავშირებით ნახეთ ამ ბმულზე