მსოფლიო ჯანდაცვის ორგანიზაციის გენერალურმა დირექტორმა, ტედროს ადჰანომ გებრეიესუსმა თავის ბრიფინგზე კორონავირუსის გრძელვადიან თანმდევ პროცესებზე ისაუბრა და მსოფლიოს მოსახლეობის იმ ნაწილს, ვინც კორონავირუსი გადაიტანა, გამაფრთხილებელი შეტყობინებები გაუგზავნა.

„არსებობს სიმპტომების ფართო სპექტრი, რომელიც დროდადრო იცვლება და ხშირად ძლიერდება“ – აცხადებს ის.

გებრეიესუსი საუბრობს დაღლილობაზე, ხველაზე, სუნთქვის გაძნელებაზე, ძირითადი ორგანოების – ფილტვისა და გულის ანთებასა და დაზიანებაზე.

ცნობისთვის, ბოლო 24 საათში მსოფლიოში კორონავირუსის დადასტურებული შემთხვევების რიცხვი 505 756-ით გაიზარდა. ჯანმოს ოფიციალურ საიტზე ეს ციფრი პანდემიის დაწყების შემდეგ რეკორდულად სახელდება.

მანამდე მაქსიმალური მაჩვენებელი 24 ოქტომბერს დაფიქსირდა – დღე-ღამეში 490 ათასი შემთხვევა.

საერთო მონაცემებით, სულ მსოფლიოში 44,9 მილიონი შემთხვევა დადასტურდა. მსხვერპლი 1,178 მილიონზე მეტია.