მედეა ვასაძე არმაზ ახვლედიანის წინააღმდეგ, ნაციონალური მოძრაობის წევრი, ევროპული საქართველოს მაჟორიტარობის კანდიდატს არაგულწრფელობაში დებს ბრალს.
„არმაზ ახვლედიანი არ არის დემოკრატი. როდესაც ის იყო „ქართული ოცნების“ პოლიტსაბჭოს წევრი, მონაწილეობდა ჩემს პარტიულად დასჯაში პოლიტიკური ურჩობისთვის. გადაწყვეტილება იყო იმდენად დაუსაბუთებელი, მიუხედავად ჩემი არაერთგზის წერილობითი მოთხოვნისა, აღნიშნულ გადაწყვეტილებაზე ვერ მომაწოდა წერილობითი პასუხი. ზოგადად, მას მაღალი პოლიტიკური თანამდებობის დაკავების ინტერესი გააჩნია“, – ამბობს მედეა ვასაძე.
საპასუხოდ, „ევროპული საქართველოს“ მაჟორიტარობის კანდიდატი აცხადებს, რომ ნაციონალურ მოძრაობას არ უნდა ქვეყანაში სტაბილური პოლიტიკური გარემო შეიქმნას.
„ამათი კლანი აჭარაში იყო მთავარი ამრევი. დღეს, პოსტს რომ წერს, ის და მისი თანამოაზრე, ვინც ყველაზე მეტად აფათურებდა ხელს აქ ყველა უცნაურ საქმეში, ყველაფერი ეს ცნობილია და დღეს უნდათ ამის დაბრუნება. ვერ დაბრუნდებით და ვერ დააბრუნებთ, იმიტომ რომ თქვენი დრო ამოწურულია. თქვენ ხართ წარსული, მე შემიძლია ეს გულახდილად გითხრათ და რაც მთავარია, ჩვენი საზოგადოება ზუსტად ხვდება წლების განმავლობაში ვინ რა ავნო აჭარას და საქართველოს“, – აცხადებს არმაზ ახვლედიანი.
