ქვეყანაში კოვიდსიტუაცია კრიტიკულია და კორონავირუსის მეორე ტალღასთან გასამკლავებლად შეზღუდვების გამკაცრება გახდება საჭირო, – ამის შესახებ საფრანგეთის სამეცნიერო საბჭოს პრეზიდენტმა, ჟან-ფრანსუა დელფრესიმ განაცხადა.
„ჩვენ ახლა რთულ, შეიძლება ითქვას კრიტიკულ სიტუაციაში ვართ. რა თქმა უნდა, ველოდით, რომ კორონავირუსის მეორე ტალღა იქნებოდა. თუმცა, გაკვირვებულები ვართ, რომ ის ასეთი სასტიკი აღმოჩნდა. მეორე ტალღა უფრო ძლიერი იქნება, ვიდრე პირველი. ჩვენმა ბევრმა თანამოქალაქემ ჯერ კიდევ ვერ გააცნობიერა, თუ რა გველის წინ“, – განაცხადა დელფრესიმ.
მისივე პროგნოზით, საფრანგეთში, შესაძლოა, კორონავირუსის შემთხვევებმა ყოველდღიურად 100 000-ს მიაღწიოს.
მისი თქმით, ვირუსის მეორე ტალღასთან საბრძოლველად ორი ვარიანტი არსებობს.
„მოქმედების ორი ვარიანტი გვაქვს. პირველი, კომენდანტის საათის მოქმედების ზონა მნიშვნელოვნად გავზარდოთ, მათ შორის კომენდანტის საათის ხანგრძლივობა. მეორე, დავაწესოთ საყოველთაო კარანტინი, რომელიც ნაკლებად მკაცრი იქნება, ვიდრე მარტში დაწესებული კარანტინი. რაც უფრო სწრაფად მივიღებთ ზომებს, მით უფრო მალე გვექნება შედეგი. კორონავირუსის მეორე ტალღა ევროპას იპყრობს და ორიდან სამ თვემდე შეიძლება გასტანოს“, – განაცხადა დელფრესიმ.
