ჯანდაცვის მინისტრის მოადგილის, თამარ გაბუნიას განცხადებით, ქვეყანაში კორონავირუსის მესამე ტალღის საკმაოდ მაღალი რისკი არსებობს.
„რა თქმა უნდა, მესამე ტალღის რისკი, განსაკუთრებით ახალ შტამებთან მიმართებაში, არის საკმაოდ მაღალი. აუცილებელია პირბადის გამოყენება. სამწუხაროდ, კვლევები აჩვენებს, რომ პირბადის გამოყენების პროცესი შემცირდა და ეს არის ერთი, რაც აუცილებლად გასაკეთებელია, ასევე, ბიზნესის გარემოში წესების დაცვა და სოციალური დისტანცირება. რაც შეეხება იმას, რომ ვაქცინაციამ რამდენად შეიძლება მოგვცეს ეფექტი მესამე ტალღის აცილებაში, ჯერჯერობით ვაქცინაციის ეფექტი იქნება მინიმალური, რადგან მოგეხსენებათ, რომ მიმდინარე პერიოდში მოსახლეობის მცირე რაოდენობის ვაქცინირება მოესწრება, თუმცა ვაქცინაციის დაწყება და მაღალი რისკის ჯგუფების ვაქცინაცია იქნება საშუალება იმისთვის, რომ ლეტალობა ჰოსპიტალიზაციის შემთხვევები შემცირდეს მინიმუმადე. ამასაც ექნება გარკვეული წვლილი, თუმცა ძირითადად არის პირადი საშუალების გამოყენება და წესების დაცვა“ , – განაცხადა გაბუნიამ.
შეგახსენებთ, რომ 13 მარტს საქართველომ “ასტრაზენეკას” ვაქცინის 43 ათასი დოზა მიიღო. 15 მარტიდან ქვეყანაში ვაქცინაციის პროცესი დაიწყო.
ვაქცინაციის შემდეგ 27 წლის მეგი ბაქრაძე ანაფილაქსიური შოკის შედეგად გარდაიცვალა.
