პარლამენტის ვიცე-სპიკერის გია ვოლსკის განცხადებით, ჩეჩნეთის ლიდერის, რამზან კადიროვის გამონათქვამები „აბრაგულ, ვაჟკაცურ, განგსტერულ, დიდაქტიკურია“.

ვოლსკი გამოეხმაურა კადიროვის იმ განცხადებას, რომლითაც ის გაბუნიას მოუწოდებს, რომ „მუხლებზე დადგეს და ბოდიში მოიხადოს“.

„სახელმწიფომ თავისი მოქალაქე უნდა დაიცვას და საერთაშორისო თანამეგობრობამ კიდევ ერთი მაგალითი უნდა ჩაწეროს დანაშაულებების იმ გრძელ სიაში თავისი პოზიციის, რომელიც ბოლო პერიოდში შეიქმნა, თუნდაც, კადიროვის გამონათქვამები – აბრაგულ, ვაჟკაცურ, განგსტერულ, დიდაქტიკურია. ეს თემა არ არის მარტივი და უბრალო. ჩვენ ვერ შევცვლით ვერც კადიროვის და ვერც გაბუნიას რიტორიკას“, – განაცხადა გია ვოლსკიმ.

შეკითხვაზე, რატომ არ ახსენებს „ქართული ოცნება“ რამზან კადიროვსა და ვლადიმერ პუტინს, ვოლსკიმ პასუხობს:

„რას ჰქვია, არ ახსენებს? ახლა ვილაპარაკე პუტინზე, კადიროვზე, დანაშაულებრივ განცხადებებზე და საერთაშორისო თანამეგობრობის რეაგირებაზე. გამოძიება მიმდინარეობს და მეტი ინფორმაცია გვეცოდინება, რას ნიშნავს, კადიროვს არ ვახსენებ? – მეშინია, მეც არ დამსაჯოს“, – განაცხადა გია ვოლსკიმ.

ცნობისთვის, 15 ივნისს მთავარი არხის გენერალურმა დირექტორმა, ნიკა გვარამიამ გაავრცელა ინფორმაცია, რომ გიორგი გაბუნიას ლიკვიდაციას ჩეჩნეთის ლიდერი, რამზან კადიროვი გეგმავდა.

მისივე თქმით, გაბუნიას რამდენიმე თვის განმავლობაში უთვალთვალებდნენ, საქმის გამოძიება კი თავდაპირველად უკრაინაში დაიწყო.

გუშინ, 16 ივნისს, კადიროვი მედიაში გავრცელებულ ინფორმაციას გამოეხმაურა და განაცხადა, რომ მის დავალებებს „ყოველთვის ასრულებენ“. მისივე თქმით, გაბუნიამ მას და მთელს რუსეთს შეურაცხყოფა მიაყენა, რისთვისაც „მუხლებზე უნდა დადგეს და ბოდიში მოიხადოს“.