მესტიის მუნიციპალიტეტის მერია მოსახლეობისა და დამსვენებლებისთვის განცხადებას ავრცელებს.

მერია მოსახლეობას მოუწოდებს, საჭიროების შემთხვევაში დაუკავშირდნენ ცხელ ხაზს, ნომერზე 144, რათა მოხდეს თითოეული მათგანის აღრიცხვა და საკარანტინო ზონაში ორგანიზებულად გადაიყვანა.

„ტურისტული მიზნით მყოფ მოქალაქეებს შეუძლიათ, კარანტინი გაიარონ სვანეთში ან სხვა რეგიონში, ასევე შეუძლიათ, დარჩნენ იმ განთავსების ობიექტში, სადაც იქნებიან იქამდე, ვიდრე დატოვებენ სვანეთს და გაივლიან კარანტინს.

მოქალაქეების საკარანტინო ზონაში ტრანსპორტირებას უზრუნველყოფს ტურიზმის ეროვნული ადმინისტრაცია. ის მოქალაქეები, რომლებიც საკუთარი ავტომობილებით იმყოფებიან სვანეთში ორგანიზებულად, მეთვალყურეობის ქვეშ საკუთარი ტრანსპორტით შეძლებენ საკარანტინო სივრცემდე მისვლას.

მოქალაქეებს, რომლებიც სვანეთში იმ სასტუმროში იმყოფებიან, რომელიც უკვე საკარანტინო სივრცედ მოეწყო, დღეიდან 14 დღის განმავლობაში სახელმწიფო აანაზღაურებს მათი განთავსების და კვების ხარჯებს.

დღეიდან მესტიის მუნიციპალიტეტში ტურიზმის ეროვნული ადმინისტრაციის ორგანიზებით მოქმედებას იწყებს მთის კურორტების განვითარების კომპანიის, ტურისტული საინფორმაციო ცენტრისა და ადგილობრივი მუნიციპალიტეტის თანამშრომლებით დაკომპლექტებული მობილური ჯგუფი, რომელიც სასტუმროებს ეწვევა და განთავსების ობიექტების წარმომადგენლებსა და დამსვენებლებს ადგილზე გააცნობს სამოქმედო გეგმას და საჭირო ინფორმაციას“ – აღნიშნულია მერიის მიერ გავრცელებულ განცხადებაში.

შეგახსენებთ, რომ 10 აგვისტოს, კორონავირუსის 25 ახალი შემთხვევიდან 17 სამეგრელო-ზემო სვანეთში დადასტურდა.

ამ დროისთვის, საქართველოში კორონავირუსის  1264 შემთხვევაა დადასტურებული. განკურნებულთა რაოდენობა სულ 1054-ს შეადგენს. კარანტინის რეჟიმში იმყოფება 7279 მოქალაქე, ხოლო სტაციონარში მეთვალყურეობის ქვეშ – 279.