ცალსახად ემიჯნება ეკლესია ძალადობას, ყოველთვის ყველანაირი ფორმით, – ამის შესახებ ახალქალაქის, კუმურდოსა და კარის მიტროპოლიტმა, მეუფე ნიკოლოზმა ნიკა მელიას საქმეზე საუბრისას “მთავარ არხთან” განაცხადა.
ამასთან, მეუფე ნიკოლოზი ამბობს, რომ ქვეყანაში სამართლებრივად უნდა გადაწყდეს ყველაფერი და დამნაშავე უნდა დაისაჯოს.
,,ცალსახად ემიჯნება ეკლესია ძალადობას, ყოველთვის ყველანაირი ფორმით, მაგრამ მეორეს მხრივ ჩვენ სახელმწიფოში ვცხოვრობთ, ყოველ შემთხვევაში ჩვენ გვინდა ყველას, რომ სამართლებრივ სახელმწიფოში ვიცხოვროთ და ეს ადვილი არ არის. ჯერ ამის გაგება რას ნიშნავს სამართლებრივი სახელმწიფო, მერე როგორ მივაღწიოთ სამართლებრივ სახელმწიფოში სამართლებრივად გადაწყდეს ყველაფერი. რა თქმა უნდა, დამნაშავე დაკავებული უნდა იყოს და უნდა გაირკვეს სამართლებრივად ეს ყველაფერი. მაგრამ ნუ ძნელია რაღაცის თქმა. მე ერთადერთი რაც შემიძლია ვთქვა და ყველას მინდა მოვუწოდო – ჩვენ ერთმანეთის მტრები არ ვართ, შეიძლება კანონიც დაირღვეს, მოხდეს ასე ამაზე შიძლება რეაგირებაც იყოს, შეიძლება ეს რეაგირება გადამეტებული იყოს. ყველაფერი შეიძლება მოხდეს, მაგრამ ჩვენ ახლა ვსწავლობთ, ახლა ვიწყებთ, ფაქტიურად სამართლებრივ სახელმწიფოს შექმნას”, – თქვა მეუფე ნიკოლოზმა ,,მთავარ არხთან”.
გუშინ დილით, 23 თებერვალს, სამართალდამცველებმა ნიკა მელია ოფისში დააკავეს.
სამართალდამცველები „ნაციონალური მოძრაობის“ოფისში დღეს დილით შევიდნენ.
ნაციონალური მოძრაობის” ოფისთან სპეციალური დანიშნულების რაზმმა ცრემლსადენი გაზი გაუშვა.
დაპირისპირების დროს სამართალდამცველებმა 21 აქტივისტი დააკავეს.
მხარდამჭერებმა მელიას დაკავება გააპროტესტეს და პარლამენტთან აქცია გამართეს.
აქციის ორგანიზატორებმა მასშტაბური აქცია 26 თებერვალს დააანონსეს.
ნიკა მელიას დაკავების ფაქტის შესახებ დაიწერა საერთაშორისო მედიაშიც.
ცნობისთვის, ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 17 თებერვალს შეუფარდა.
