„მოლაპარაკებების არეალი დავიწროვდა – მმართველმა პარტიამ ოპოზიციას ყველა ტიპის კომპრომისი შესთავაზა, რაც კი შეიძლება შეეთავაზებინა“ – ამის შესახებ „ქართული ოცნების“ დეპუტატმა ბექა დავითულიანმა ოპოზიციასთან მოლაპარაკებების თაობაზე დასმული კითხვის პასუხად განაცხადა.
„მმართველმა პარტიამ ოპოზიციას ყველა ტიპის კომპრომისი შესთავაზა, რაც კი შეიძლება შეეთავაზებინა – გარდა ერთისა, რაზეც თავიდანვე ვთქვით, რომ წითელი ხაზია. ქართველი ხალხის არჩევანი ჩვენი მხრიდან რევიზიას ვერ დაექვემდებარება“, – განაცხადა ბექა დავითულიანმა.
მისივე თქმით, პარლამენტში უნდა იყოს ოპოზიცია, მაგრამ „ოპოზიციამ საკუთარი არჩევანი თავად გააკეთა, როცა ხალხის მიერ მინიჭებულ მანდატზე უარი თქვა“.
„მთლიანი ხელისუფლება კი მათთვის ხალხს არ მიუნიჭებია. მათი პასუხისმგებლობაა – უნდათ განახორციელებენ დაკისრებულ უფლებამოსილებას, უნდათ – არ განახორციელებენ“, – აღნიშნა ბექა დავითულიანმა.
